तीन विश्वकप विजेतासहितको समूहले किन्यो क्लब

काठमाडौं। तीन जना विश्वकप विजेता खेलाडीसहितको अन्तर्राष्ट्रिय लगानी समूहले पोर्चुगलको शीर्ष डिभिजन क्लब एस्टेरेला दा अमाडोराको ९० प्रतिशत सेयर खरिद गरेको छ।

जर्मनीका थोमस मुलर र माट्स हुमेल्स, फ्रान्सका लुकास हर्नान्डेज तथा स्विट्जरल्यान्डका गोलरक्षक यान सोमरसमेत रहेको समूहले क्लबको बहुमत स्वामित्व लिएको हो।

उक्त समूहले पूर्वमालिक तथा अध्यक्ष पाउलो लोपोलाई करिब ४ करोड युरो तिरेर क्लबको ९० प्रतिशत हिस्सेदारी खरिद गरेको बताइएको छ। लोपोले सन् २०२० मा एस्टेरेला क्लब ७२ हजार युरोमा खरिद गरेका थिए।

क्लबले मंगलबार उक्त सम्झौताको पुष्टि गरेको हो। लगानी समूहको नेतृत्व एडभान्टेज र लिडले गरेका छन् भने केआई समूहको समेत समर्थन रहेको छ।

मुलर र हुमेल्स सन् २०१४ मा जर्मनीले विश्वकप जित्दा टोलीका महत्त्वपूर्ण सदस्य थिए। त्यसको चार वर्षपछि हर्नान्डेज फ्रान्सले विश्वकप जित्दा टोलीमा थिए।

स्विट्जरल्यान्डका पूर्वगोलरक्षक सोमर हाल क्लब ब्रुगमा खेलिरहेका छन्। उनी गत सिजनको अन्त्यमा इटालीको लिग विजेता इन्टर मिलानबाट बाहिरिएका थिए।

मुलरले लामो समय बायर्न म्युनिखमा खेल्दा यी तीनै खेलाडीसँग फरक–फरक समयमा सहकर्मीका रूपमा खेलेका थिए।

एस्टेरेलाको नयाँ अध्यक्षका रूपमा योहानेस मोसमाङले लोपोको स्थान लिनेछन्। ३५ वर्षीय मोसमाङले पछिल्लो एक दशक बायर्न म्युनिखमा खेलाडी व्यवस्थापन विभागमा काम गरेका थिए।

एस्टेरेला दा अमाडोराका लागि यो निकै उल्लेखनीय परिवर्तन हो। क्लब सन् २०११ मा टाँट पल्टिएको थियो। सन् २०२० मा सिन्त्रासँगको विलयपछि एस्टेरेला पोर्चुगलको तेस्रो तहबाट पुनः यात्रा सुरु गर्दै सन् २०२३ मा शीर्ष डिभिजनमा फर्किएको थियो।

गत सिजन १८ टोली सहभागी पोर्चुगिज शीर्ष डिभिजनमा एस्टेरेला १५औं स्थानमा रह्यो। आफूभन्दा तल रहेको कासा पियाविरुद्धको राम्रो आपसी खेलको रेकर्डका कारण उसले रेलिगेसनबाट जोगिन सफल भयो।

एस्टेरेला क्लब लिस्बनबाट करिब १० किलोमिटर उत्तरपश्चिममा रहेको अमाडोरा सहरमा आधारित छ। तीन विश्वकप विजेतासहितको लगानी समूहको प्रवेशसँगै क्लबले अब आर्थिक तथा खेलकुद दुवै क्षेत्रमा नयाँ उचाइ हासिल गर्ने अपेक्षा गरिएको छ।