कुशलको अर्धशतकमा नेपालको दोस्रो जित

काठमाडौं। नेपाल ‘ए’ क्रिकेट टोलीले अस्ट्रेलियामा जारी टप एन्ड टी–२० सिरिजमा लगातार दोस्रो जित निकालेको छ।

बुधबार सम्पन्न खेलमा नेपालले अस्ट्रेलियन क्यापिटल टेरिटोरी (एसीटी) विरुद्ध ४ विकेटको जित हात पारेको हो। योसँगै नेपालले प्रतियोगितामा चार खेलबाट दुई जित र दुई हारसहित ४ अंक जोडेको छ। नेपाल पहिलो खेलमा नर्दन टेरिटोरी स्ट्राइकसँग आठ विकेटले पराजित भएको थियो।

अर्को खेलमा बंगलादेश हाइ प्रफरमेन्स ११ सँग ९ विकेटको फराकिलो हार बेहोरेको थियो। तर, तेस्रो खेलमा भने होबार्ट हुरिकेन्स एकेडेमीलाई ३९ रनले पराजित गर्दै प्रतियोगितामा पुनरागमन गरेको थियो।

एसीटीले दिएको १४१ रनको लक्ष्य पछ्याएको नेपालले ४ बल बाँकी रहँदा ६ विकेट गुमाएर १४४ रन बनाएको हो।

नेपालका कप्तान कुशल भुर्तेलले सर्वाधिक ६१ रन बनाए। ४७ बल खेलेका उनले ५ चौका र १ छक्का प्रहार गरे। जारी प्रतियोगितामा अर्धशतक प्रहार गर्ने उनी पहिलो नेपाली खेलाडी हुन्।

मयांक यादव २१ र लोकेश बम १२ रनमा आउट हुँदा पवन सर्राफ २९ र विपिन खत्री ३ रनमा अविजित रहे। बाँकी खेलाडीले दोहोरो अंकमा रन बटुल्न सकेनन्।

एसीटीका ज्याक केओघले सर्वाधिक ३ विकेट लिए। ४ ओभर बलिङ गरेका उनले २० रन खर्चिए। जित मेहताको नाममा २ विकेट रह्यो।