सिटीले इलियासलाई अनुबन्ध गर्ने

काठमाडौं। ब्राजिलियन क्लब पाल्मेइरासका विंगर एलेन इलियासलाई म्यानचेस्टर सिटीले अनुबन्ध गरेको छ।

अधिकतम ३ करोड ४२ लाख पाउन्ड (करिब ४ करोड ६६ लाख अमेरिकी डलर) खर्च गर्ने गरी सम्झौता गरेको बेलायती सञ्चारमाध्यमहरूले जनाएका छन्।

बीबीसी र स्काई स्पोर्ट्सका अनुसार २२ वर्षीय ब्राजिलियन खेलाडीका लागि सिटीले सुरुमा ३ करोड २० लाख पाउन्ड तिर्नेछ। सम्झौतामा थप २० लाख पाउन्डसम्म बोनस तथा अन्य प्रोत्साहन रकमको व्यवस्था गरिएको छ।

विंगरका रूपमा खेल्ने एलेनले आक्रमणकारी मिडफिल्डरको भूमिका पनि निर्वाह गर्न सक्छन्। उनी सन् २०१९ मा पाल्मेइरासको युवा टोलीमा आबद्ध भएका थिए। जनवरी २०२५ मा क्लबको सिनियर टोलीबाट डेब्यु गरेका थिए।

त्यसयता उनले पाल्मेइरासका लागि ९६ खेल खेल्दै ९ गोल र १२ असिस्ट गरेका छन्। उनी सन् २०२४ र २०२६ मा पाल्मेइरासले जितेको साओ पाउलो राज्यको शीर्ष डिभिजन प्रतियोगिता क्याम्पियोनाटो पाउलिस्टाको टोलीका सदस्यसमेत थिए।

ब्राजिलियन सञ्चारमाध्यमका अनुसार नयाँ क्लबमा स्थानान्तरणको तयारीका कारण एलेनले बुधबार सान्तोसविरुद्ध हुने कोपा डो ब्राजिलको क्वार्टरफाइनल खेल गुमाउने सम्भावना छ।

एलेनलाई सिटीले ब्राजिलियन खेलाडी साभिन्होको सम्भावित स्थानान्तरणको विकल्पका रूपमा भित्र्याउन लागेको बताइएको छ। साभिन्हो सिटीबाट टोटनह्याम हट्सपर जाने तयारीमा रहेको रिपोर्ट सार्वजनिक भएका छन्।

यस स्थानान्तरणसँगै सिटीले आफ्नो आक्रमणपंक्तिमा युवा प्रतिभालाई थप्दै भविष्यका लागि टोली बलियो बनाउने तयारी गरेको देखिएको छ।