विवादको बाबजुत फुटसलको प्रशिक्षकमा विष्णु

काठमाडौं । अखिल नेपाल फुटबल संघ (एन्फा) को फुटसल कमिटीले राष्ट्रिय फुटसल टिमको मुख्य प्रशिक्षकमा विष्णु गुरुङलाई नियुक्त गरेको छ ।

फुटसल कमिटीले आइतबार राष्ट्रिय टिमको मुख्य प्रशिक्षकमा विष्णुलाई नियुक्त गरेको हो । इरानमा आयोजना हुने एएफसी फुटसल च्याम्पियनसिप छनोटका लागि नेपालले विष्णुलाई मुख्य प्रशिक्षक नियुक्त गरेको हो । यस्तै सहायक प्रशिक्षकमा गौरव बस्नेत नियुक्त भएका छन् ।

फुटसल कमिटीका संयोजक तथा एन्फाका केन्द्रिय सदस्य दावा लामाले विष्णुलाई मुख्य प्रशिक्षकमा नियुक्त गरेको जानकारी खेलपाटीलाई गराए । तर, मुख्य प्रशिक्षक चयन विवादरहित भने हुन सकेन ।

खेलाडी छनोट नहुँदै प्रशिक्षक चयनको विषयमा विवाद देखिएको थियो । फुटसलका अन्य प्रशिक्षकहरुले आफुहरुसँग छलफल नगरी कमिटिका संयोजक लामाले एकलौटी तरिकाले मुख्य प्रशिक्षक छनोट गरेको भन्दै बिरोध जनाएका छन् । 

'हामीले सुरुमै आफ्नो मान्छे प्रशिक्षकमा ल्याउने भएपछि विरोध जनाएका थियौ । त्यसैले खेलाडी छनोट पछि मात्रै प्रशिक्षक चयन गर्ने बताइएको थियो । तर, त्यो भएन । हामीसँग कुरै नभई आफ्नो मान्छेलाई हालियो ।’ नाम नखुलाउने सर्तमा एक प्रशिक्षकले भने ।

अन्य प्रशिक्षकहरुले विष्णुसँग प्रशिक्षकको अनुभव नभएको र हालसम्म कुनै पनि ठुलो स्तरको प्रशिक्षकमा काम नगरेकालाई सिधै मुख्य प्रशिक्षकमा नियुक्त गरेको भन्दै आपत्ति जनाएका हुन् ।

'सुरुमै विवाद आएपछि एन्फाका महासचिवसहित संयोजक लामाले हामीसँग मिटिङ गरेका थिए । छलफल गरेर मात्रै प्रशिक्षक निर्णय गर्ने कुरा भएको थियो । तर, एक्कासी कुनै जानकारी बिनै विष्णुलाई ल्याइएको छ ।’ उनले थपे । 

यसअघि प्रशिक्षक छनोटमा सिनियरलाई प्राथमिकता दिने गरिएको थियो । तर, यस पटक भने कमिटिले सिनियरलाई प्राथमिकतामा राखेनन् ।

प्रतियोगिताका लागि खेलाडी छनोट भने ११ प्रशिक्षकको छनोट कमिटीले गरेका थिए । कमिटीमा चक्र तामाङ, चेतन घिमिरे, बिक्रम महर्जन, दिपक भुषाल, नरेश श्रेष्ठ, सरोज थापा, विष्णु गुरुङ, गौरव बस्नेत, जिवन सिंकेमान, प्रकाश परियार र विनोद लामा थिए ।

छनोटमा नेपाल समूह 'ए' मा रहेको छ । यस समूहमा नेपालसहित ताजकिस्तान, उज्वेकिस्तान र अफगानिस्तान रहेका छन् ।

नेपालले ताजकिस्तानसँग कात्तिक ६ गते पहिलो खेल खेल्नेछ । यस्तै नेपालले दोस्रो खेलमा उज्वेकिस्तानसँग कात्तिक ७ गते खेल्नेछ । उज्वेकिस्तान चार पटकको उपविजेता टिम हो । नेपालले अन्तिम खेल अफगानिस्तानसँग कात्तिक ८ गते खेल्नेछ ।

छनोटको शीर्ष टिम फाइनल चरणमा छनोट हुनेछन् । फाइनल चरणको खेल भने फेब्रुवरी २७ देखि मार्च ८ गतेसम्म तुर्केमिनिस्तानमा आयोजना हुनेछ ।