काठमाडौं । हिमालयन बैंकले पहिलो संस्करणको स्कोडा अन्तर बैंक फुटसल च्याम्पियनसिपको उपाधि जितेको छ ।
ढोलाहिटीस्थित एक्टिभ स्पोर्ट्स कम्प्लेक्समा शनिबार भएको फाइनलमा ग्लोबल आईएमई बैंकलाई ३-० गोल अन्तरले पराजित गर्दै हिमालयन च्याम्पियन बनेको हो ।
उपाधिसँगै हिमालयनले १ लाख नगद पुरस्कार प्राप्त गरेको छ । यस्तै उपविजेता बनेको ग्लोबलले ५० हजार प्राप्त गर्यो । यस्तै विजेता र उपविजेता टिमका सदस्यले एक्टिभ स्पोर्ट्स कम्प्लेक्समा एक बर्षको लागि निशुल्क स्विमिङ गर्न पाउने छन् ।
प्रतियोगितामा हिमालयनका आचल खत्री मोस्ट भ्यालुएबल खेलाडी र सुरज चन्द उत्कृष्ट गोलकिपर चुनिए । यस्तै हिमालयनका आचल खत्री, बिबेक महर्जन र एनआईसी एसियाका सुरज महर्जन संयुक्त रुपमा सर्वाधिक गोलकर्ता चुनिए । मोस्ट भ्यालुएबल, उत्कृष्ट गोलकिपर र सर्वाधिक गोलकर्ताहरुले एक बर्षको लागि निशुल्क स्विमिङ गर्न पाउने छन् ।
एक्टिभ स्पोर्ट्स कम्प्लेक्सको आयोजनामा भएको प्रतियोगितामा २० बैंकहरुको सहभागिता रहेको थियो । मोरंग अटो वर्क्स अन्तर्गत स्कोडा गाडीको मुख्य प्रायोजनमा जारी प्रतियोगितामा बैंकमा कार्यरत कर्मचारीले मात्र खेलेका थिए ।
विजेता खेलाडीहरुलाई नेपाल राष्ट्र बैंकका गभनर्र डा चिरन्जिबी नेपाल लगायतले पुरस्कृत गरेका थिए ।
