संगीता र चन्द्र कला पहिलो खेलमै पराजित

काठमाडौं । दोस्रो संस्करणको इन्डियन ओपन अन्तर्राष्ट्रिय बक्सिङ प्रतियोगिताको पहिलो दिन नेपालका तीन खेलाडी पहिलो चरणबाटै बाहिरिएका छन्  ।

गुवाहाटीस्थित नविन चन्द्र बोर्डलाई इन्डोर स्टेडियममा सोमबार प्रतिस्पर्धा गरेका संगीता सुनार, चन्द्र कला थापा र सुरेन्द्र राई पहिलो खेलमै पराजित भए ।

महिला ६० केजी लाइट वेल्टर तौल समूहमा संगीता भारतको 'एफ' टिमकी प्रति बेनिवालसंग अंकको आधारमा ५-० ले पराजित भईन् । संगीताले पहिलो संस्करणमा पनि प्रतिस्पर्धा गरेकी थिईन् । 

यस्तै महिला ५७ केजी लाइट तौल समूहमा चन्द्र कला भारतको ‘सी’ टिमकी सोनिया लेथेरसंग अंकको आधारमा ५-० ले नै पराजित भईन् ।

त्यस्तै पुरुषतर्फ ५६ केजी बेन्टम तौल समूहमा सुरेन्द्र थाइल्याण्डका चाटचाई डेचु बुटडीसंग अंकको आधारमा ५-० ले नै पराजित भए ।

सोमबार सुरु प्रतियोगितामा नेपालबाट ६ पुरुष र ५ महिला गरि ११ खेलाडीले प्रतिस्पर्धा गरिरहेका छन् ।