काठमाडौं । पिपुल्स एकेडेमीले तेश्रो यु–१६ राष्ट्रिय पुरुष बास्केटबल प्रतियोगितामा शुक्रबार जित हात पारेको छ ।
नेपाल बास्केटबल संघद्वारा आयोजित प्रतियोगितामा पिपुल्सले काभ्रेको बेलोर एकेडेमीलाई ५८–१८ को विशाल अन्तरले पराजित गर्यो । पिपुल्सको जितमा स्वरुपराज सेढाईंले १९ अंक योगदान गरे ।
अन्य खेलमा हिमालय, स्वर्णिम र इन्फ्यान्सी क्लबले सफलता पाए । जोनको १८ अंक सहयोगमा हिमालयले काठमाडौं जेभियरलाई ५९–४३ ले हरायो । काठमाडौं जेभियरका प्रशान्तले २४ स्कोर गरे ।
स्वर्णिमले मोक्सदामाथि ४०–२२ को जित दर्ता गर्यो । विजयी टिमका लागि कुङगा गुरुङले १५ अंक जोडे । इन्फ्यान्सीले विल्सन एकेडेमीलाई ५६–५१ ले पाखा लगायो ।
विजयी टिमका लागि विशाल राईले २० अंक जोडे । विल्सनका पेम्बा शेर्पाले २३ स्कोर गरेपनि टिमलाई जित दिलाउन सकेनन् । प्राइम कलेजमा भइरहेको प्रतियोगिताअन्तर्गत शनिबार ६ खेल हुनेछ ।
