बाँके । नवौं वृहत राष्ट्रिय खेलकुद प्रतियोगिता गण्डकी प्रदेशमा हुने पक्का भएको छ । सातौ राष्ट्रिय खेलकुद प्रतियोगिता सञ्चालनको समयमा गरिएको निर्णय अनुसार नवौं राष्ट्रिय खेलकुद आयोजनाको जिम्मेवारी गण्डकी प्रदेशलाई दिने बिषयमा सहमती बनेको छ ।
राष्ट्रिय खेलकुद परिषद राखेपका सदस्य सचिव केशवकुमार विष्टले यसअघि गरिएको निर्णय अनुसार गण्डकी प्रदेशले नवौं राष्ट्रिय खेलकुदको आयोजना गर्ने सहमती बनेको खेलपाटीलाई बताए ।
‘कोरम पुग्ने अवस्था छैन । सोही कारण बोर्ड बैठक बस्दैन । यसअघिनै भएको निर्णय अनुसार नवौं तत्कालिन पश्चिमाञ्चल अर्थात गण्डकी प्रदेशले आयोजना गर्छ । यसअघिको निर्णयनै कायम रहन्छ ।’ विष्टले खेलपाटीसंग भने ।
तत्कालिन पश्चिमाञ्चलले आठौं राष्ट्रिय खेलकुद प्रतियोगिता पोखरामा आयोजना गर्ने दाबी गरेको थियो । तर तत्कालिन खेलकुद मन्त्री दलजित श्रीपालीले निकै जोड गरेर मध्यपश्चिमलाई आठौंको आयोजना गर्न दिने निर्णय गराएका थिए । उनले सोही समय नवौंको आयोजना पश्चिमाञ्चललाई दिने औपचारिक सहमती गराएका थिए ।
वर्तमान खेलकुद मन्त्री जगत विश्वकर्मा समेत गण्डकी प्रदेशबाट निर्वाचित सांसद हुन् । उनले समेत नवौं संस्करण गण्डकी प्रदेशमा आयोजना हुने बताईरहेका थिए ।
पछिल्लो समय कर्णाली प्रदेशले समेत आयोजनाको बिषयमा चर्को लबिङ गरिरहेको थियो ।
