राष्ट्रिय कीर्तिमानसहित गौरिका र शुभमलाई स्वर्ण
बाँके । आठौं राष्ट्रिय खेलकुद अन्तर्गत राष्ट्रिय पौडीमा आर्मीका गौरिका सिंह र एपीएफका सुभम श्रेष्ठले राष्ट्रिय कीर्तिमानसहित स्वर्ण पदक जितेका छन् ।
नेपालगञ्जमा मंगलबार गौरिकाले १०० मिटर बटरफ्लाईमा कीर्तिमानसहित स्वर्ण जितेका हुन् ।
महिला १०० मिटर बटरफ्लाईमा गौरिकाले निर्धारित दुरी १ मिनेट ०७ दशमलब ९७ सेकेण्डमा पुरा गर्दै स्वर्ण जितिन् । उनले आफ्नै नाममा रहेको १ मिनेट ०८ दशमलब ६३ सेकेण्डको कीर्तिमान भंग गरेकी हुन् ।
यस स्पर्धामा आर्मीकी डुवना लामाले १ मिनेट १४ दशमलब ०७ सेकेण्डसहित रजत र एपीएफकी श्रीवी महर्जनले १ मिनेट २१ दशमलब ३७ सेकेण्डको समय निकाल्दै कांस्य पदक जितिन् ।
पुरुष १०० मिटर बटरफ्लाईमा आर्मीका अनुभव सुब्बाले १ मिनेट सुन्य दशमलब ६२ सेकेण्डको समयसहित स्वर्ण जिते ।
यस स्पर्धामा पुलिसका श्यद हम्जा शाहले १ मिनेट सुन्य दशमलब ६६ सहित रजत र एनआरएनएका नाथन दोर्जे शेर्पाले १ मिनेट १ दशमलब ७५ सेकेण्डको समय निकाल्दै कांस्य जिते ।
पुरुष ५० मिटर ब्रेष्टस्ट्रोकमा एपीएफका सुभमले ३१ दशमलब ९० सेकेण्डको समयसहित स्वर्ण जिते । हिट चरणमा ३१ दशमलब ६० को समय निकालेका उनको यो राष्ट्रिय कीर्तिमान हो । उनले आफ्नै नामको ३२ दशमलब ०१ सेकेण्डको किर्तिमान भंग गरे ।
यस स्पर्धामा पुलिसका दिपाङ्कर अवालेले ३३ दशमलब २५ सेकेण्डको समयसहित रजत र बेदज्ञा राज जोशीले ३४ दशमलब ४२ सेकेण्डसहित कांस्य जिते ।
महिला ५० मिटर ब्रेष्टस्ट्रोकमा आर्मीकी डुवना लामाले स्वर्ण, आर्मीकै उपास्ती महर्जनले रजत र एपीएफकी टिशा शाक्यले कांस्य जितिन् ।
यस्तै गौरिकाले महिला २०० मिटर ब्याकस्ट्रोक्समा स्वर्ण जितिन् । यस स्पर्धामा पुलिसकी अनुस्का पोखरेलले रजत र एपीएफकी दिया स्थापितले कांस्य जितिन् ।
पुरुषतर्फ एनआरएनएका नाथन दोर्जे शेर्पाले स्वर्ण, एपीएफका तेन्जिङ गुरुङले रजत र एपीएफकै नाशिर हुसेनले कांस्य जिते ।
गौरिकाले महिला २०० मिटर फ्रिस्टाइलमा समेत स्वर्ण जितिन् । आर्मीकी डुवना लामाले रजत र एपीएफकी टिशा शाक्यले कांस्य जितिन् ।
पुरुषमा पुलिसका गौरव लामाले स्वर्ण जित्दा, पुलिसकै तरुण भण्डारीले रजत र एपीएफका उर्गेन महर्जनले कांस्य जिते ।
त्यस्तै ४ गुणा १०० मिटर टिम रिलेको महिलातर्फ आर्मीले स्वर्ण जित्दा पुलिसले रजत र एपीएफले कांस्य जित्यो ।
पुरुषतर्फ टिम रिलेमा पुलिसले स्वर्ण, एपीएफले रजत र आर्मीले कांस्य जित्यो ।
