बाँके । आठौं राष्ट्रिय खेलकुद अन्तर्गत राष्ट्रिय पौडीमा एलेक्स शाह र शयद हम्जा शाहले राष्ट्रिय कीर्तिमान कायम गरेका छन् ।
नेपालगञ्जमा सोमबार आर्मीका एलेक्सले १०० मिटर फ्रिस्टाइलमा कीर्तिमान बनाए । स्वर्ण जित्ने क्रममा एलेक्सले निर्धारित दुरी ५५ दशमलब ३८ सेकेण्डमा पुरा गरे । उनले शिरिष गुरुङको नाममा रहेको ५७ दशमलब ०३ सेकेण्डको कीर्तिमान भङ गरे ।
यस स्पर्धामा पुलिसका शयद हम्जा शाहले ५७ दशमलब १० सेकेण्डसहित रजत र आर्मीका अनुभव सुब्बाले ५७ दशमलब ९७ सेकेण्डको समयसहित कास्य जिते ।
यस्तै पुलिसका शयद हम्जाले पुरुष ५० मिटर बटरफ्लाईमा राष्ट्रिय कीर्तिमान बनाएका छन् । कीर्तिमानसहित स्वर्ण जित्ने क्रममा सायद हम्जाले २७ दशमलब १० सेकेण्डको समय निकाले । उनले आर्मीका अनुभव सुब्बाको नाममा रहेको २७ दशमलब ७१ सेकेण्डको राष्ट्रिय कीर्तिमानलाई भंग गरे ।
यस स्पर्धामा अनुभवले २७ दशमलब ३१ सेकेण्डको समय निकाल्दै रजत जिते । उनले पनि आफ्नो कीर्तिमानमा सुधार गरे । २९ दशमलब ८२ सेकेण्डको समयसहित एपीएफका तेन्जिङ गुरुङले कास्य जिते ।
पुरुष ४ सय मिटर फ्रिस्टाइलमा एनआरएनएका नाथन दोर्जे शेर्पाले स्वर्ण जिते । उनले ४ मिनेट ३३ दशमलब ०९ सेकेण्डको समय निकाले । ४ मिनेट ३९ दशमलब ४७ सेकेण्डसहित एपीएफका नासिर हुसेनले रजत जित्दा ५ मिनेट ०१ दशमलब ५० सेकेण्डसहित एपीएफकै उर्गेन महर्जनले कास्य जिते ।
महिलातर्फ आर्मीकी गौरिका सिंहले दुई स्वर्ण जितिन् । महिला १०० मिटर फ्रिस्टाइलमा गौरिकाले १ मिनेट सुन्य दशमलब ६२ सेकेण्डको समय निकाल्दै स्वर्ण जितिन् । आर्मीकै सोफिया शाहले १ मिनेट ०३ दशमलब ७८ सेकेण्डको समयसहित रजत र एपीएफकी टीसा शाक्यले १ मिनेट ०३ दशमलब ९१ सेकेण्डसहित कास्य जितिन् ।
महिला ५० मिटर बटरफ्लाईमा पनि गौरिकाले स्वर्ण हात पारिन । उनले ३३ दशमलब ०६ सेकेण्डको समय निकालिन । यस स्पर्धामा पुलिसकी अनुसिया तण्डुकारले ३४ दशमलब ६२ सेकेण्डसहित रजत र सृबी महर्जनले ३७ दशमलब ३० सेकेण्डको समय निकाल्दै कास्य जितिन ।
पुरुष २०० सय मिटर ब्रेस्टस्ट्रोकमा एपीएफका सुभम श्रेष्ठले स्वर्ण जित्दा पुलिसका दीपानकर अवालेले रजत र प्रदेश १ का विकास कुमालले कास्य जिते ।
महिला २०० सय मिटर ब्रेस्टस्ट्रोकमा आर्मीकी डुवाना लामाले स्वर्ण जितिन् । आर्मीकै उपास्ती महर्जनले रजत र पुलिसका अदिप्सा बैद्यले कास्य जितिन् ।
