काठमाडौं । जेभियर इन्टरनेसनल कलेज र गोल्डेनगेट इन्टरनेसनल कलेज बिभिएस अन्तरकलेज बास्केटबल प्रतियोगिताको सेमिफाइनलमा प्रवेश गरेका छन् । यस्तै सीसीआरसी र टाइम्सले पनि सेमिफाइनलमा स्थान सुरक्षित गरे ।
नक्सालस्थित बृहस्पति विद्यासदनको कोर्टमा मंगलबार भएको ब्वाइजतर्फको खेलमा जेभियरले आयोजक बृहस्पति विद्यासदन (बिभिएस) लाई ७२–२७ को फराकिलो अन्तरले पराजित गर्दै सेमिफाइनलमा स्थान सुरक्षित गरेको हो ।
गोल्डेनगेटले इनसाइट भिजनलाई ५९–५४ ले पराजित गर्यो । गोल्डेनगेटको जितमा आक्रिस शाहीले १६ अंकको योगदान दिए ।
यस्तै सीसीआरसीले प्रवेश तामाङको १७ अंकको सहयोगमा क्याम्पिनलाई ८५–२५ ले पाखा लगायो । सुजन लिम्बुको १९ अंकको सहयोगमा टाइम्सले मोर्गानको चुनौती ५६–३८ ले पन्छायो ।
