पुलिसलाई बागमतीको बलियो लक्ष्य

काठमाडौं। बागमती प्रदेशले प्रधानमन्त्री कप एकदिवसीय क्रिकेट प्रतियोगितामा विभागीय टोली नेपाल पुलिस क्लबलाई २६६ रनको लक्ष्य दिएको छ।

माथिल्लो मूलपानी क्रिकेट मैदानमा टस जितेर पहिले ब्याटिङ थालेको बागमतीले ४९.२ ओभरमा सबै विकेट गुमाएर २६५ रनको प्रतिस्पर्धात्मक योगफल तयार पारेको छ। ईशान पाण्डे र पवन थापाले चौथो विकेटका लागि १२४ रनको शतकीय साझेदारी गरेपछि बागमती बलियो स्थितिमा पुगेको हो।

बागमतीका पवनलले सर्वाधिक ७९ रन बनाए। १०१ बलमा खेलेका उनले ६ चौका र १ छक्का प्रहार गरे। ईशानले ८० बलमा ६ चौका र ३ छक्कासहित ७० रन बनाए।

आशुतोष घिरौया २२, शुभ कंसाकार १४, सन्दीप लामिछाने १३ र शिवम तिवारी १२ रनमा आउट भए।

पुलिसका राशिद खान र दिनेश खरेलले समान ३ विकेट हात पारे। करण केसीले २ र ललित राजवंशीले १ विकेट लिए।