सन्दीपसहित ८ नेपाली खेलाडीले इयू टी–२० लिग खेल्ने

काठमाडौं। नेपाली राष्ट्रिय क्रिकेट टोलीका कप्तान रोहित पौडेल, उपकप्तान दीपेन्द्रसिंह ऐरी र ‘ग्लोबल आइकन’ सन्दीप लामिछानेसहित ८ नेपाली खेलाडी बेल्जियममा हुन लागेको इयू टी–२० लिग खेल्ने भएका छन्।

बेल्जियमको यो पहिलो फ्रेन्चाइज क्रिकेट लिग हो। लिग आगामी जुन ६ देखि १४ जुनसम्म आयोजना हुनेछ। लिगमा नेपाल प्रिमियर लिग (एनपिएल) टोली जनकपुर बोल्ट्स (जेबी) को लगानीकर्ता कम्पनी ड्रिम स्पोर्ट्सको स्वामित्वमा रहेको जेबी ब्रुजेजसहित आन्थ्रोप एङकर्स, ब्रसेल्स, हेन्ट, लुभेन र लिइज रेड लायन्स छन्।

रोहित, विकेटकिपर ब्याटर आशिफ शेख, बलर ललितनारायण राजवंशी र इशान पान्डेसहित चार खेलाडी मंगलबार भएको ड्राफ्टबाट विभिन्न टोलीमा अनुबन्ध भएका हुन्। विकेटकिपर ब्याटर अनिलकुमार साह र अलराउन्डर गुल्शनकुमार झा ‘अप्सनल राउन्ड’बाट छानिएका हुन्।

अलराउन्डर दीपेन्द्रलाई यसअघि नै जेबी ब्रुग्सले प्रि-साइन गरेको थियो। लेग स्पिनर सन्दीपलाई पनि लियेज रेड लायन्सले प्रि-साइन गरेको थियो।

रोहित गेन्ट ग्लाडियटर्समा अनुबन्ध भएका छन्। उनलाई क्याटेगोरी ‘बी’ बाट लिइएको हो। आशिफ शेखलाई एन्टवर्प एंकर्सले क्याटेगोरी ‘सी’ बाट आफ्नो टोलीमा भित्र्यायो।

लिलित र इशानलाई दीपेन्द्र आबद्ध जेबीले आफ्नो टोलीमा लिएको छ। यी दुई खेलाडीलाई जेबीले क्याटेगोरी ‘सी’बाट लिएको हो।

जेबीले दीपेन्द्रलाई ड्राफ्टअघि नै तेस्रो विदेशी खेलाडीका रूपमा टोलीमा अनुबन्ध गरेको थियो। त्यसअघि न्युजिल्यान्डका कलिन मनरोलाई टोलीले पहिलो सिजनका लागि भित्र्याएको थियो। जेबीले दक्षिण अफ्रिकाका ब्याटर सी भान डर डुसेनलाई पनि यसरी नै भित्र्याएको थियो।

अनिल र गुल्शन भने क्याटेगोरी ‘सी’मा ‘अप्सनल राउन्ड’बाट जेबीमा आबद्ध भए। योसँगै ५ नेपाली खेलाडीले जेबीबाट एक साथ लिग खेल्ने भएका छन्।