आर्मी र हेल्प नेपाल लगातार दोस्रो जितको खोजिमा

काठमाडौं। नवौं एनभीए महिला तथा पुरुष क्लब भलिबल च्याम्पियनसिपअन्तर्गत आइतबार चार खेल हुँदैछन्।

त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा हुने पहिलो खेलमा महिलातर्फ समूह ‘ए’ अन्तर्गत चुली युवा क्लबले विभागीय टोली त्रिभुवन आर्मी क्लबसँग प्रतिस्पर्धा गर्नेछ। आर्मी दोस्रो जितको खोजीमा रहँदा चुली पहिलो जितको लक्ष्यमा हुनेछ। खेल बिहान १० बजे सुरु हुनेछ।

यस्तै, महिलातर्फकै समूह ‘बी’ अन्तर्गत सुदूरपश्चिम प्रदेशले अर्को विभागीय टोली एपीएफसँग खेल्नेछ। उक्त खेल दिउँसो १२ बजेबाट सुरु हुनेछ। एपीएफले आफ्नो पहिलो खेलमा मधेस प्रदेशलाई ३–० को सोझो सेटमा पराजित गरेको थियो भने सुदूरपश्चिम पहिलो खेलमा नेपाल पुलिससँग उसैगरी पराजित भएको थियो।

पुरुषतर्फ समूह ‘ए’ अन्तर्गत हेल्प नेपाल स्पोर्ट्स क्लबले मणिमुकुन्द भलिबल क्लबसँग प्रतिस्पर्धा गर्नेछ। यो खेल दिउँसो २ बजेबाट सुरु हुनेछ। हेल्प नेपालले दोस्रो खेल खेल्दैछ भने मणिमुकुन्दले प्रतियोगितामा आफ्नो पहिलो खेल खेल्नेछ।

अन्तिम खेलमा समूह ‘बी’ अन्तर्गत पुलिस क्लबले खिल्जी युवा क्लबसँग दिउँसो ४ बजे खेल्नेछ। पुलिसले पहिलो खेलमा ढोरपाटन स्पोर्ट्स क्लबलाई पराजित गरेको थियो भने खाल्जीले आइतबार पहिलो खेल खेल्न लागेको हो। हाल समूह ‘बी’ मा पुलिस ३ अंकसहित शीर्ष स्थानमा रहेको छ।