एनपीस यू–१६ अन्तरविद्यालय फुटबल : रोमाञ्चक खेलसँगै सेमिफाइनल दौड तिव्र

तनहुँ। एनपीस यू–१६ अन्तरविद्यालय फुटबल प्रतियोगितामा आजका खेलहरू निकै प्रतिस्पर्धात्मक र रोमाञ्चक बने। अमर भू.पु. सेकण्डरी स्कुलले खैरेनी सेकण्डरी स्कुललाई २–० ले पराजित गर्दै सहज जित दर्ता गर्‍यो।

दुवै गोल इर्शान थापाले गर्दै टोलीलाई जित दिलाए। अर्को खेलमा मिन मा.बि.ले ज्ञान ज्योति बिद्या कुञ्जलाई २–१ ले हरायो।

मिन मा.बि.का लागि निशान शाही र सजल श्रेष्ठले एक–एक गोल गरेका थिए भने ज्ञान ज्योतिको तर्फबाट कुशल पुनले एक मात्र गोल फर्काए।

तेस्रो खेलमा तालबेसी सेकण्डरी स्कुलले अरनिको इङ्ग्लिश बोर्डिङ स्कुलमाथि २–० को जित निकाल्यो। सौरभ थापा र मन्दिप श्रेष्ठले गोल गर्दै तालबेसीलाई विजयी बनाएका थिए।

दिनको सबैभन्दा रोमाञ्चक खेल नेपाल पोलिस स्कुल र शिशु कल्याण सेकण्डरी स्कुलबीच भयो। खेलभरि तीन पटक अग्रता लिएको शिशु कल्याण अन्ततः ३–३ को बराबरीमा रोकियो। नेपाल पोलिसका राम छेत्रीले दुई तथा ओमन श्रेष्ठले एक गोल गरे। शिशु कल्याणका रोनाल्डो दर्लामीले ह्याट्रिक गर्दै टोलीलाई जितको नजिक पुर्‍याएका थिए। बराबरीपछि खेल टाई ब्रेकरमा पुगेको थियो।

पेनाल्टी सुटआउटमा नेपाल पोलिस स्कुले ५–४ को जित निकाल्दै अर्को चरणमा स्थान सुरक्षित गर्‍यो। शिशु कल्याणका सुरेश गाहा निर्णायक पेनाल्टीमा चुक्दा टोली बाहिरिन बाध्य भयो। खेलभरि उत्कृष्ट प्रदर्शन गर्दै तीन पटक अग्रता लिए पनि अन्त्यमा पेनाल्टीमा हार बेहोर्नु शिशु कल्याणका लागि दुर्भाग्यपूर्ण बन्यो।

_व