मेहता राखेपको कार्यवहाक सदस्य सचिव

काठमाडौं। राष्ट्रिय खेलकुद परिषद् (राखेप)को कार्यवहाक सदस्य सचिवको जिम्मेवारी राम चरित्र मेहतालाई दिइएको छ।

सदस्य सचिव टंकलाल घिसिङ चार वर्षे कार्यकाल पूरा गरेर बिदा भएपछि रिक्त रहेको जिम्मेवारीमा मेहतालाई कार्यवहाक तोकिएको हो।

राखेपको बोर्ड अध्यक्षसमेत रहेका युवा तथा खेलकुदमन्त्री बब्लु गुप्ताले मेहतालाई कार्यवहाक जिम्मेवारी तोकेका हुन्।

मेहता हाल युवा तथा खेलकुद मन्त्रालयको खेलकुद विकास महाशाखाको सहसचिवमा कार्यरत छन्। राष्ट्रिय खेलकुद विकास ऐन २०७७ को दफा १७ को उपदफा १२ मा सदस्य सचिवको पद रिक्त भएमा अर्को व्यवस्था नभएसम्मका लागि संघीय निजामती सेवाको राजपत्रांकित प्रथम श्रेणीको कर्मचारी वा परिषद्को वरिष्ठतम् कर्मचारीलाई सदस्य सचिवको रुपमा कामकाज गर्ने गरी तोक्न सक्ने व्यवस्था छ।

घिसिङको चार वर्षको कार्यकाल पूरा भएपछि राखेपको सदस्य सचिवको पद रिक्त अवस्थामा छ। खेलकुद मन्त्रालयले केही दिनमा छनोट समिति बनाएर खुला आवेदनमार्फत सदस्य सचिव छनोटको प्रकृया अघि बढाउने तयारी गरेको छ।