‘ममाथिको कारबाही वैधानिक छैन’

मलाई अर्को साधारण सभासम्मका लागि कारबाही गरिएको छ। मेरो धारणा स्पष्ट छ– जुन तरिकाले यो कारबाही गरिएको हो, त्यो वैधानिक छैन। यदि महासचिवजस्तै जिम्मेवार पदमा रहेका व्यक्तिमाथि पनि कारबाही गर्न सकिन्छ भने यस्तो कदम चाल्नु उचित हुँदैन।

म सायद भोलि वा पर्सिदेखि यस विषयमा आधिकारिक प्रेस विज्ञप्ति जारी गर्ने तयारीमा छु। मेरो बुझाइमा अहिले जुन तरिकाले आधा घण्टाभित्रै जुम बैठक बोलाइएको छ, त्यो पूर्ण रूपमा अवैधानिक हो।

अध्यक्षज्यू (पंकजविक्रम नेम्वाङ) हाल जुम्लामा हुनुहुन्छ र त्यहीँबाट भर्चुअल बैठकमा सहभागी हुनुभएको छ। मलाई वैधानिक रूपमा कार्यभार दिइएको अवस्थामा साधारण सभाले गरेको निर्णयलाई लत्याउने अधिकार महासचिव (किरण राई) सँग छैन।

धुलिखेलको साधारण सभाले वार्षिक बजेट र वार्षिक कार्यक्रम पारित गरिसकेको हुँदा त्यसलाई स्थगित गर्ने अधिकार महासचिवसँग छैन। अध्यक्षज्यू बाहिर रहँदा मलाई विधानको धारा ४२(६) र ४४(२) बमोजिम कार्यवाहक अध्यक्षको जिम्मेवारी दिइएको थियो।

मैले महासचिवलाई सोधेको थिएँ,‘साधारण सभाले गरेको निर्णयलाई किन र कुन कारणले बेवास्ता गर्नुभयो?’ तर, उहाँले त्यसको जवाफ दिनुभएन। त्यसपछि मैले आफ्नो वैधानिक अधिकार प्रयोग गरेर कदम चालें।

मेरो तर्क स्पष्ट छ- महासचिव एउटा कर्मचारी हुन् र म निर्वाचित पदाधिकारी। अहिले उहाँले विधान र नियमको कुरा गर्नुभएको छ, तर यदि साँच्चै विधान मान्ने हो भने कारबाही किन आवश्यक भयो?

सबैभन्दा दुःख लागेको कुरा के हो भने साधारण सभाले गरेको निर्णय अध्यक्षज्यू र महासचिवले पालना गर्नुभएन र कार्यसमितिका साथीहरूले पनि त्यसलाई ग्रहण गर्न सकेनन्।

यसको अर्थ कार्यसमिति र अध्यक्ष दुवै साधारण सभाप्रति उत्तरदायी नरहेको स्थिति देखिन्छ। उहाँहरूले ममाथि कारबाही गर्नुभएको छ, केही दिनका लागि। म यसलाई ठिकै ठान्छु।

तर, यो देशमा कानून र विधि स्थापित छ। त्यसैले म केही दिनभित्रै कानूनी आधारमा आवश्यक प्रक्रिया अघि बढाउने तयारीमा छु।

वीरबहादुर खड्का अखिल नेपाल फुटबल संघ (एन्फा)का वरिष्ठ उपाध्यक्ष हुन्।