नेपाल स्कुल फुटबल यु–१८ लिग शनिबारबाट

काठमाडौं। थन्डरबोल्ट्स डेभलपमेन्ट सेन्टरको आयोजनामा नेपाल स्कुल फुटबल यु–१८ लिग (एनएसएफएल) आगामी शनिबारबाट सुरु हुने भएको छ। प्रतियोगिता ललितपुरको धापाखेलस्थित थन्डरबोल्ट्स डेभलपमेन्ट सेन्टरमा सञ्चालन हुनेछ।

आयोजकका अनुसार प्रतियोगितामा कान्जिरोवा स्कुल, जेम्स स्कुल, डिएभी स्कुल, चेल्सी वर्ल्ड स्कुल, लिटल एन्जल्स स्कुल, रातो बंगला स्कुल, काठमाडौं वर्ल्ड स्कुल र युलेन्स स्कुलका टिमले प्रतिस्पर्धा गर्नेछन्। 

प्रतियोगिता लिग चरणमा राउण्ड रोबिनको आधारमा सञ्चालन हुनेछ भने त्यसपछि शीर्ष चार टोलीबीच प्ले अफ खेल हुनेछ। आयोजक संस्था थन्डरबोल्ट्सका कार्यकारी निर्देशक वरुण खड्काका अनुसार विजेता टोलीले पाँच लाख रुपैयाँ नगद पुरस्कार पाउनेछ, जुन हालसम्मको स्कुल तहकै सबैभन्दा ठूलो पुरस्कार हो। 

उपविजेताले दुई लाख ५० हजार रुपैयाँ प्राप्त गर्नेछ। त्यस्तै, उत्कृष्ट गोलकर्ता, उत्कृष्ट खेलाडी र उत्कृष्ट गोलरक्षकले जनही ५० हजार रुपैयाँ पुरस्कार प्राप्त गर्नेछन्।

थन्डरबोल्ट्स डेभलपमेन्ट सेन्टरले फुटबलसँगै स्विमिङ, टेनिस, फुटसल, ई–स्पोर्ट्स लगायतका गतिविधिमा पनि प्रशिक्षण सञ्चालन गरिरहेको छ। निकट भविष्यमा क्रिकेटसमेत सुरु गर्ने तयारी भइरहेको जानकारी आयोजकले दिएको छ।