महिला कबड्डी विश्वकप पुनः अनिश्चितकालका लागि स्थगित

काठमाडौं। हैदराबादको गाछीबौली इनडोर स्टेडियममा साउन १८ देखि २५ (अगस्ट ३–१०) सम्म आयोजना हुने भनिएको दोस्रो महिला कबड्डी विश्वकप अनिश्चितकालका लागि स्थगित गरिएको छ।

यो प्रतियोगिता यसअघि पनि एकपटक सारिएको थियो। सुरुमा जून महिनामा बिहारमा यो विश्वकप आयोजना गर्ने योजना बनाइएको थियो।

भारतीय एमेच्योर कबड्डी महासंघ (एकेएफआई) ले अन्तर्राष्ट्रिय कबड्डी महासंघ (आइकेएफ) लाई पठाइएको पत्रमा टिम व्यवस्थापनसम्बन्धी विवरण समयमै नआएका कारण सम्बन्धित मन्त्रालयहरूबाट अनुमति लिन ढिलाइ भएको र यही कारण प्रतियोगिता स्थगन गर्नुपरेको जनाइएको छ।

महासंघले सहभागी राष्ट्रको सूचीमा कुनै फेरबदल स्वीकार नगरिने स्पष्ट पारेको छ। पत्रमा भनिएको छ,‘सूचीमा परिवर्तन आएमा प्रशासनिक प्रक्रिया अवरुद्ध हुन्छ, जसले अनुमतिमा थप ढिलाइ गराउँछ।’

भारत, नेपाल, बंगलादेश, इरान, जापान, थाइल्यान्ड, युगान्डा, जाञ्जिबार, अर्जेन्टिना, चाइनिज ताइपेई, पोल्यान्ड, जर्मनी, नेदरल्यान्ड्स र केन्यालगायत १४ देश यस प्रतियोगितामा सहभागी हुने कार्यक्रम थियो।

अब यो विश्वकप प्रिमियर प्रो कबड्डी लिग सकिएपछि हैदराबादमै हुने सम्भावना छ। प्रो कबड्डी लिग भदौ १२ (अगस्ट २९) बाट विशाखापट्टनमबाट सुरु हुने कार्यक्रम छ।