क्रिकेटर अभय यादव सम्मानित

काठमाडौं। मलेसियामा सम्पन्न एसीसी यु-१६ इस्ट जोन कप विजेता अभय यादवलाई काठमाडौं क्रिकेट एकेडेमीले सोमबार सम्मान गरेको छ।

कार्यक्रममा एकेडेमीका निर्देशक जगत टमाटा र संचालक मदन कार्कीको प्रमुख उपस्थितिमा अभयको उपलब्धिको कदर गर्दै प्रशंसा गरिएको थियो।

सर्लाही, मधेश प्रदेश घर भई पछिल्लो चार महिनादेखि उक्त एकेडेमीमा नियमित प्रशिक्षणरत रहेका यादवले मलेसियामा आयोजित प्रतियोगिताको फाइनलमा सिंगापुरविरुद्ध ३ विकेट लिँदै प्लेयर अफ द म्याचको उपाधि हात पारेका थिए। त्यस्तै ब्याटिङमा पनि उनले अविजित १० रन जोडेका थिए। 

प्रतियोगिताभरि खेलेका ५ खेलमा उनले १० विकेट लिँदै नेपालको दोस्रो सर्वाधिक विकेट लिने खेलाडी बनेका थिए।

गत महिना सुर्खेतमा सम्पन्न टीबी शाह मेमोरियल यु-१६ प्रतियोगितामा पनि उनले ७ खेलमा १९ विकेट लिँदै उत्कृष्ट बलरको उपाधि जितेका थिए।