नेताको नाममा हुने प्रतियोगितालाई झन्डै ३ करोड बजेट

काठमाडौं। युवा तथा खेलकुद मन्त्रालयले नेताका नाममा हुने विभिन्न प्रतियोगिताका लागि झन्डै ३ करोड रुपैयाँ बाँढ्ने प्रस्ताव अघि सारिएको छ।

मन्त्रालयको रातो कितावअनुसार सबैभन्दा बढी रकम मदन भण्डारी स्मृति स्पोर्ट्स एकेडेमीले पाउने छ। यो एकेडेमीले १ करोड रुपैयाँ पाउने भएको हो। आर्थिक वर्ष २०८१/८२ को बजेटमा यो एकेडेमीले २ करोड रुपैयाँ पाएको थियो। 

तर, गणेशमान सिंह स्मृति राष्ट्रिय महिला तथा पुरुष बक्सिङ प्रतियोगिता सञ्चालन गर्न ५० लाख, सहाना प्रधान स्मृति राष्ट्रिय महिला हक्की प्रतियोगिता ७ लाख, गिरिजा प्रसाद कोइराला स्मृति राष्ट्रिय पुरुष हक्की प्रतियोगिताका लागि ७ लाख, प्रज्ञा स्मृति साईक्लिङ प्रतियोगिताका लागि १५ लाख, रामवृक्ष यादव स्मृति राष्ट्रिय कुस्ती प्रतियोगिता आयोजनाका लागि १० लाख बजेट काटिएको थियो।

यसपल्ट त्यो बजेट पुन: ब्यूँताइएको छ। गणेशमान सिंह स्मृति प्रतिष्ठानले ५० लाख रुपैयाँ पाउने भएको छ। गिरिजाप्रसाद स्पोर्ट्स एकेडेमीले पनि ५० लाख रुपैयाँ नै दिने प्रस्ताव राखिएको छ।

यस्तै, शहिद जगत प्रकाशजंग शाह राष्ट्रिय फुटबल प्रतियोगिताका लाथि ३०, विपी कोइराला स्पोर्ट्स एकेडेमीलाई ५० र जय पृथ्वीबहादुर सिंह गौरीगंगा राष्ट्रिय फुटबल प्रतियोगिता गर्न १० लाख रुपैयाँ छुटाइएको छ।