प्रथम मिस्टर महानगर बडीबल्डिङ च्याम्पियनसिप असार ६ र ७ गते

काठमाडौं। प्रथम मिस्टर महानगर बडीबल्डिङ च्याम्पियनसिप असार ६ र ७ गते आयोजना हुने भएको छ। महानगरपालिका २२ वडाको आयोजनामा हुने प्रतियोगिताको पहिलो दिन तौल नाप्ने कार्य हुनेछ। दोस्रो दिन प्रि–जजिङ र फाइनल खेल हुनेछ। 

तौल नाप्ने तथा फाइनल खेल दुवै काठमाडौंको प्रदर्शनी मार्गस्थित राष्ट्रिय सभागृहमा हुनेछ। यस वर्ष  पुरुष तर्फमात्र प्रतिस्पर्धा हुनेछ। अर्को वर्षबाट महिला तर्फबाट पनि प्रतिस्पर्धा गराउने आयोजकले जनाएको छ।
नेपाल शारिरीक सुगठन तथा फिटनेस महासंघको सहकार्य तथा काठमाडौं जिल्ला शारीरिक सुगठन तथा फिटनेस संघको प्राविधिक सहयोगमा हुने प्रतियोगितामा कूल ६ तौल समूहमा खेलाइनेछ । 

जसअन्तर्गत ५५ केजी, ६० केजी, ६५ केजी, ७० केजी, ७५ केजी र ७५ भन्दा माथि तौल समूहमा प्रतिस्पर्धा हुनेछ। हरेक तौल समूहमा विजेता, उपविजेता र तेस्रो स्थानमा रहने खेलाडीलाई क्रमशः ७५ हजार, ५० हजार र २५ हजार पुरस्कार प्राप्त गर्नेछन्। साथै चौथो र पाँचौ हुने खेलाडीलाई पनि क्रमशः १५ हजार र १० हजार रुपियाँ र पदक प्रदान गरिनेछ।

प्रत्येक तौल समूहको विजेताहरू मिस्टर महानगरको दावेदारिताका लागि ओभरअल प्रतिस्पर्धामा खेल्नका लागि छनोट हुनेछन् । ओभरअल प्रतिस्पर्धामा विजेता खेलाडीलाई मिस्टर महानगरको टाइटलसहित नगद पाँच लाख प्राप्त गर्नेछन्।