अस्ट्रेलिया छाडेर राष्ट्रिय टिमको जर्सी लगाउने सपना देखेका नन्दन
काठमाडौं। प्राय: सबैले भन्छन्– सपना पूरा गर्न देश पार गर्नुपर्छ। तर, नेपाली राष्ट्रिय क्रिकेट टोलीका मध्य गतिका बलर नन्दन यादव अहिले भन्दा हुन्– कहिलेकाहीँ आफ्नो सपना साकार पार्न घर फर्कनुपर्छ !
तीन वर्ष अघिसम्म अस्ट्रेलियामा व्यावसायिक क्रिकेट खेलिरहेका नन्दन गत मंसिरमा त्रिवि क्रिकेट मैदानमा भएको नेपाल प्रिमियर लिग खेल्न स्वदेश फर्किएका थिए।
कर्णाली याक्समा ११ लाखमा अनुबन्धित भएका उनले ठिकठाकै प्रदर्शन गरे। उनको लक्ष्य यही फ्रेन्चाइजी क्रिकेट खेलेर अस्ट्रेलिया फर्किने नै थियो। सोही लक्ष्यअनुसार उनले माघ ४ गते उड्ने सुसार कसिसकेका थिए। विमानस्थल जानुअघि नन्दनले सिराहामा रहेकी आमा समिरालाई एकपल्ट फोन लगाए।
आफू अस्ट्रेलिया फर्कन लागेको जानकारी गराउँदै आशिर्वाद लिए। विमानस्थल भित्र बोडिङ र लगेज चेकिङ गरेर उनी उड्ने पर्खाइमा थिए। तर, अचानक किन हो? नन्दनको मन एक्कासि फेरियो। त्यो दिन उनले टिकट मात्रै फालेनन्, अस्ट्रेलियाको सुनौलो सपनासमेत त्यागे। अनि नेपालमा नै केही गर्ने मनसाय बनाएर विमानस्थलबाट फर्किए।
त्यसको दुई महिनामै उनले नेपाली राष्ट्रिय टोलीमा टी–२० डेब्यु पाए। हङकङ सिरिजमा ६ विकेट लिए। ३७ रन बनाए। अब नन्दनलाई रोक्न गाह्रो हुँदै गयो। र, त्यसपछि आयो त्यो दिन… जुन दिनका लागि उनले जहाज चढ्न अस्वीकार गरेका थिए।
आइसिसी क्रिकेट विश्वकप लिग २ अन्तर्गत स्कटल्यान्ड भ्रमण उनी एक दिवसीय टोलीमा पनि अटाए। भ्रमणमा निस्कनुअघि उनी त्यति खुसी थिएनन्। भन्थे, ‘टिममा पर्दैमा खुसी हुने होइन। खुसी त त्यो बेला हुने हो जब राम्रो प्रदर्शन गरेर टिमलाई जिताइन्छ।’
उनको भनाइ स्वाभाविक पनि थियो। स्कटल्यान्ड निस्किनुअघि लिगको अंक तालिकामा नेपाल दैनिय अवस्था थियो। १२ खेल खेल्दा जम्मा ६ अंक हात पारेको नेपाललाई जसरी पनि यो भ्रमणमा धेरैभन्दा धेरै जित निकाल्नु नै थियो।
त्यसैले दबाबमा रहेको नेपालले पहिलो खेलमा स्कटल्यान्डलाई १ र अर्को खेलमा नेदरल्यान्डलाई ५ विकेटले पराजित गर्दै सानदार सुरुआत गर्यो। तर, तेस्रो खेलमा स्कटल्यान्डविरुद्ध एक दिवसीय अन्तर्राष्ट्रिय क्रिकेटकै कीर्तिमानी ३२१ रन बनाए पनि नेपाल २ रनले पराजित हुन पुग्यो।
यी तीन खेलमा नन्दन बेन्चै रहे। तर, भ्रमणको अन्तिम खेलमा नेदरल्यान्ड्सविरुद्ध खेल्नुअघि तीव्र गतिका बलर सोमपाल कामी घाइते भएपछि नन्दनले वर्षै कुरेको डेब्युको सपना पूरा भयो। उनी नेपालका लागि एक दिवसीय क्रिकेटमा डेब्यु गर्ने ४२औं खेलाडी बने।
यो कथा आज मात्रै सुरु भएको होइन। काठमाडौं, दिल्ली, श्रीलंका, अस्ट्रेलिया हुँदै उनले यो सपना पूरा गर्न वर्षौंदेखि कुरिरहेका थिए। त्यो सपना पूरा भएको दिन उनले सानदार बलिङ गरेर र ३ विकेट लिए। योसँगै नेपालले खेल १६ रनले जित्यो र यो भ्रमण सुखद् अन्त्य गर्ने अवसर बनायो।
यो जितसँगै उनी आफ्नो डेब्युमा मात्रै होइन, टिमको नतिजाले पनि दंग छन्। भन्छन्, ‘राम्रो गर्छु भनेर सोचेको थिएँ, झन राम्रो भयो खुसी छु। त्योभन्दा बढी हामीले ६ अंक लिएर जाँदैछौं। अब अगाडी पनि राम्रो गर्छौं। त्यही गर्ने चाहना भएर नै हो अस्ट्रेलिया नगई म नेपालमै बसेको।’
