ओलम्पिकमा पहिरो, उपाध्यक्ष राणाले दिए राजीनामा

काठमाडौं । विवादीत बनेको नेपाल ओलम्पिक कमिटीको नयाँ निर्वाचनबाट बनेको कार्यसमितिमा पहिरो जान सुरु भएको छ । 

अवैधानिक तरिकाले जबर्जस्ती रुपमा अध्यक्ष जीवनराम श्रेष्ठले गराएको निर्वाचनबाट उपाध्यक्ष निर्वाचित प्रकाश शमशेर राणाले पदबाट राजीनामा दिएका छन् ।

अदालतमा विचाराधिन अपहेलनाको मुद्धा र सरकारले समेत कारबाहीको तयारी गरेपछि नेपाल तेक्वान्दो संघका अध्यक्ष समेतत रहेका राणाले पदबाट राजीनामा दिएका छन् ।

अन्तराष्ट्रिय ओलम्पिक कमिटी आईओसीलाई गुमराहमा राख्दै जीवनराम श्रेष्ठले गराएको निर्वाचनबाट राणालाई उपाध्यक्ष पदमा निर्विरोध निर्वाचित भएको घोषणा गरिएको थियो । 

कानुनी जोखिम र सरकारको कारबाहीबाट बच्न राणाले पदबाट राजीनामा दिएको ओलम्पिक स्रोतले बताएको छ । 

नेपाल तेक्वान्दो संघका महासचिव दिपराज गुरुङले अदालतको सम्मान र सरकारको निर्देशन पालना गर्दै अध्यक्षले एनओसीको उपाध्यक्ष पदबाट राजीनामा दिएको खेलपाटीलाई बताए । 

'विधान अनुसारनै तेक्वान्दोबाट अध्यक्ष ओलम्पिक निर्वाचनमा सहभागी हुनभएको हो । अदालतले ओलम्पिकलाई विधान संशोधन सहित निर्वाचन रोक्न निर्देशन दियो । त्यो ओलम्पिकको विषय थियो, संघ वा प्रतिनिधिको विषय थिएन । तर अदालतको आदेश अनुसार खेलकुदको कार्यकारी निकायले निर्देशन दिएपछि त्यसको पालना गर्नुपर्छ भनेर अध्यक्षले राजीनामा दिनुभएको छ । उहाँको राजीनामालाई नेपाल तेक्वान्दो संघको बोर्ड बैठकले जानकारीमा लिएको छ ।' गुरुङले भने । 

गुरुङका अनुसार उम्मेदवारी मनोनयन गराएर राणा भारत गएका थिए । भारतमै रहदाँ उनी प्रकृयामा निर्विरोध निर्वाचित भएको घोषणा गरिएको थियो । राणा भारतबाट फर्किएपछि अदालती आदेशको सम्मान र सरकारको निर्देशन पालना गर्दै ओलम्पिक उपाध्यक्षबाट राजीनामा दिएका हुन् ।

अदालतको आदेश र सरकारको निर्देशनको अवज्ञा गर्दै आईओसीलाई समेत गुमराहमा राखेर जीवनराम श्रेष्ठले अनलाईनबाट कर्मकान्डी रुपमा निर्वाचनको प्रकृया पुरा गरेका थिए । अन्तिम मतदान प्रकृयालाई निर्विरोध उपाध्यक्ष बनेका अनिल शर्मा र सदस्य मनिष जोशी सहित ७ जनाले वहिष्कार गरेका थिए ।

जीवनराम श्रेष्ठको अवैधानिक चुनावमा सहभागी बन्ने २७ संघलाई सरकारले स्पष्टिकरण सोधेर कारबाहीको तयारी गरेको छ । साथै अदालती आदेशको अवहेलनाको मुद्धालाई समेत प्राथमिकताका साथ अघि बढाउने तयारीको तयारी छ । 

आईओसीको सुझाव विपरित जबर्जस्ती गरिएको विधान संशोधन र अस्विकृत विधानमा टेकेर गरिएको निर्वाचनलाई अन्तराष्ट्रिय ओलम्पिक कमिटीले मान्यता दिएको छैन । 

ओलम्पिकको उपाध्यक्ष पदबाट राजीनामा दिएका राणा नेपाली कांग्रेस निकट हुन् । कांग्रेसले खेलकुद मन्त्रालयको नेतृत्व गरिरहदाँ जीवनराम श्रेष्ठलाई अध्यक्ष बनाउने वर्तमान कार्यसमितिमा अधिकांश कांग्रेस निकटकै खेल पदाधिकारीको बाहुल्यता छ । 

नेपाली कांग्रेसको भ्रातृ संगठन नेपाल लोकतान्त्रिक खेलकुद महासंघले ओलम्पिक चुनाव अवैधानिक रहेको भन्दै निर्वाचन प्रकृयामा सरिक हुने सम्पुर्णलाई कारबाही गर्न माग गरेको छ । कांग्रेसकै खेलकुद मन्त्री तेजुलाल चौधरीले ओलम्पिक चुनावी प्रकृयामा सामेल हुने सम्पुर्ण खेलकुद संघ र तिनका पदाधिकारीलाई कारबाही गर्ने अडान लिएका छन् । मन्त्री चौधरीले नेपाल ओलम्पिक चुनावको निष्पक्ष छानविनका लागि अन्तराष्ट्रिय ओलम्पिक कमिटीलाई पत्र लेखेका छन् भने अवैधानिक निर्वाचनबाट गठन गरिएको नेपाल ओलम्पिक कमिटीलाई तत्काल कारबाही प्रकृया अघि बढाउने जानकारी गराएका छन् । 

नेपाली खेलकुद र कांग्रेसको खेल राजनीतिमा प्रभावशाली मानिने दिपराज गुरुङ संलग्न तेक्वान्दो संघका अध्यक्ष प्रकाश राणाले ओलम्पिकबाट राजीनामा दिनुलाई अर्थपूर्ण रुपमा हेरिएको छ ।