काठमाडौं। जापान महिला राष्ट्रिय भलिबल टोलीकी पूर्वखेलाडी काजुमी नाकामुरा नेपाल आएकी छन्। उनलाई एनपिओ रियाले वर्ल्डले काठमाडौं ल्याएको हो। नेपाली ग्रासरुट भलिबललाई प्रोत्साहन गर्ने उद्देश्यले रियालेले काजुमीलाई निम्त्याएको हो। नेपाल भ्रमणका क्रममा काजुमीले भलिबल संस्कृति आदानप्रदान गर्ने र विभिन्न क्लबसँग प्रशिक्षण तथा कार्यशालामा सहभागी भइरहेकी छन्।
काजुमीको जन्म १९७१ मा भएको हो। उनले प्राथमिक विद्यालयको पाँचौं कक्षादेखि भलिबल खेल्न थालेकी थिइन्। १९८९ मा स्नातक गरेपछि उनले युनिटिका फिनिक्स नामक कम्पनीबाट भलिबलखेल्न थालेकी थिइन्।
त्यही वर्ष अगस्टमा उनले विश्व जुनियर महिला (यु-२०) भलिबल च्याम्पियनसिपमा जापानको प्रतिनिधित्व गर्दै कांस्य पदक जितिन्। १९९० मा उनले एसियाली जुनियर च्याम्पियनसिपमा जापानी टोलीको कप्तानको भूमिका निभाएकी थिइन्। टोलीलाई जित दिलाउन महत्त्वपूर्ण योगदान गरेकी उनले त्यस च्याम्पियनसिपमा मोस्ट भ्यालुएबल प्लेअरको उपाधि जितिन्। १९९१ मा उनी पहिलोपटक जापानको अल-नेशनल टोलीमा छनोट भएकी थिइन्। सोही वर्षको विश्वकपमा उनले सहभागिता जनाइन्।
नाकामुराले १९९२ को बार्सिलोना ओलम्पिक र १९९६ को एटलान्टा ओलम्पिकमा लगातार भाग लिएर आफ्नो छवि बलियो बनाइन्। १९९८ मा उनले सक्रिय खेलबाट अवकाश लिइन्। नेपाल भ्रमणका क्रममा काजुमीले नेपाली भलिबल क्लबसँग ज्ञान र अनुभव बाँड्दै यस खेललाई अझ उचाइमा पुर्याउन मद्दत पुर्याउने अपेक्षा गरिएको छ।
