ललितको आइपिएल खेल्ने सपना

काठमाडौं। नेपाल प्रिमियर लिग (एनपिएल) मा जनकपुर बोल्ड्सलाई लगातार तीन खेलसम्म अपराजित राख्न लाहिरू मिलान्थाको सानदार ब्याटिङ (१४४ रन) मात्रै होइन, स्पिनर ललितनारायण राजवंशीको उत्कृष्ट बलिङ पनि उत्तिकै निर्णायक छ। 

पहिलो खेलमा विराटनगर किङ्सलाई १२७ रनमै रोक्न ओपनर लोकेश बल, प्रतीश जिसी र बसीर अहमदको विकेट लिएका उनी कर्णाली याक्सविरुद्ध भने खासै चल्न सकेनन्। ओपनर देव खनालको मात्रै विकेट लिएका उनले किफायती बलिङ गरेर कर्णालीलाई विशाल लक्ष्यसम्म पुग्न भने रोके। त्यस क्रममा उनले मात्रै चार ओभर बलिङ गर्दै १६ रन खर्चिए। 

तर, बिहीबार पोखरा एभेन्जर्सविरुद्धको खेलमा उनीले पुनः आफ्नो उत्कृष्ट लय समाते र चार ओभरमा ३१ खर्चिँदै तीन विकेट लिए। यस क्रममा उनले आन्द्रेस गौसलाई २०, कप्तान कुशल भुर्तेललाई ६ र मार्कस क्रिस्लेलाई ३० रनमा आउट गर्दै १३८ रनमा रोक्न उनी सफल भए। गौस र मार्कस अट्याकिङ ‘मुड’ मा देखिएका थिए। तर, गौसलाई आसिफ शेख र मार्कसलाई कप्तान अनिलकुमार साहबाट क्याच आउट गराए। योसँगै उनी सर्वाधिक विकेटकर्ताको सूचीमा दोस्रो स्थानमा उक्लिएका छन्। 

उनीभन्दा भन्दा अगाडी पाकिस्तानका ३९ वर्षीय पेसर सोहेल तन्वीर छन्। उनले ललितले भन्दा मात्र एक विकेट बढी (आठ) लिएका छन्। तर, ललितको नजर भने सबैलाई पछि पारेर आफू नै सर्वाधिक विकेटकर्ताको सूचीमा पर्ने लक्ष्य छ।

उनी भन्छन्, ‘विश्वास छ, उच्च विकेटकर्ताको सूचीमा हुन्छु भनेर। तर, आगामी खेल कस्तो हुन्छ त्यसमा भर पर्नेछ।’ जनकपुरले आइतबार पहिलो खेलमै जितनजिक पुगेर पनि सम्हालिन नसकेको लुम्बिनी लायन्सको सामना गर्नेछ। त्यसपछि उसलाई अंक तालिकामा पछ्याइरहेको सुदूरपश्चिम रोयल्सको। र, त्यसपछि काठमाडौं गुर्खाज र चितवन राइनोजसँग पनि प्रतिस्पर्धा गर्न बाँकी छ। 

यी चारमध्ये कुनै दुई खेल जितेमा पनि जनकपुरले प्लेअफमा स्थान बनाउने पक्का देखिन्छ। हालको अंक तालिकाअनुसार अपराजित रहेका सुदूरपश्चिम र चितवन समान चार अंकसहित दोस्रो र तेस्रो स्थानमा छन्। काठमाडौं दुई अंकसहित चौथो र विराटनगर किङ्स समान अंकसहित पाँचौं स्थानमा छ। यी दुई टोलीले जनकपुरले झैं तीन खेल खेलिसकेका छन्। एक खेल खेलेको लुम्बिनी होस् या समान दुई खेल खेलिसकेका कर्णाली र पोखराले भने तालिकामा कुनै अंक जोड्न सकेका छैनन्।

ललित भारतीय खेलाडी हर्षल पटेल र रविन्द्र जडेजाका ठूला ‘फ्यान’ हुन्। उनलाई मन पर्ने इन्डियन प्रिमियर लिग (आइपिएल) फ्रेन्चाइजी भने पाँचपल्टको विजेता चेन्नइ सुपर किङ्स हो। ३४ वर्षीय अलराउन्डर हर्षल सात सिजन रोयल्स च्यालेन्जर्स बैंग्लोरबाट खेलेर अर्को सिजनका लागि सनराइजर्स हैदरावाद पुगेका छन्। उनलाई हैदरावादले आठ करोड भारुमा भित्र्याएको हो।

३५ वर्षीय अर्का अलराउन्डर जडेजालाई भने चेन्नईले यसपल्ट १८ करोड भारू खर्च गरेर ‘रिटेन’ गरेको छ। सायद यी दुई अलराउन्डरको यो नै अन्तिम आइपिएल हो। यसपछि उनीहरूले बलिङबाट विकेट लिएको र ब्याटिङबाट चौका र छक्का बर्साएको देखिने छैन। तर, २५ वर्षीय ललितले भने सबै नेपाली खेलाडीले देख्ने झैं साझा सपना देखेका छन्, करिअरमा एकपल्ट आइपिएल जसरी पनि खेल्ने!

नेपाली खेलाडीमध्येबाट आइपिएल खेल्ने एक मात्रै खेलाडी लेग स्पिनर सन्दीप लामिछाने हुन्। उनले सन् २०१८ र १९ मा दुई सिजन समान २० लाख भारूमा दिल्ली क्यापिटल्सबाट आइपिएल खेलेका थिए। तर, नौ खेलमा मात्रै बलिङ देखाउन पाएका उनले २९२ रन खर्चिँदै १३ विकेट लिए।

यद्यपि, विश्वका प्राय: सबै फ्रेन्चाइजी प्रतियोगिता खेलिसकेका सन्दीपलाई भित्र्याउन त्यसयता कुनै आइपिएल टोलीले चासो देखाएनन्। अहिले चेन्नईको ब्याटिङ र फिल्डिङ प्रशिक्षकको जिम्मेवारी सम्हालिसकेका भारतका राजीव कुमारले पनि एनपिएलमा पोखरा सम्हालिरहेका छन्।

यस्तै, आइपिएल टोलीसँग काम गरिसकेका उमेश पटवाल त जनकपुरकै मुख्य प्रशिक्षक छन्। त्यसबाहेक नेपाली टोलीका मुख्य प्रशिक्षक मोन्टि देसाईले पनि राजस्थान रोयल्स र गुजरात लायन्समा ‘पर्फमेन्स कोच’ र ‘ट्यालेन्ट सकाउट’को जिम्मेवारी बहन गरिसकेका छन्। यी तीन जना प्रशिक्षकले नै ललितको प्रतिभा नजिकबाट नियाल्ने मौका पाएका छन्। के उनको सपना साकार पार्न यी प्रशिक्षकले आआफ्नो स्थानबाट सहयोग गर्लान् त?