काठमाडौं। बेलायतका टेनिस स्टार एन्डी मुर्रेले सक्रिय व्यावसायिक खेल जीवन टुंग्याएका छन्। फ्रान्समा जारी पेरिस ओलम्पिकअन्तर्गत टेनिसको पुरुष डबल्सको क्वार्टरफाइनलमा सिधा सेटमा पराजय बेहोरेपछि मुर्रेले उक्त निर्णय गरेका हुन्।
ओलम्पिकका दुई पटकका स्वर्ण विजेता मुर्रे र डान इभान्सको जोडीले अमेरिकाका टेलर फ्रिट्ज र टमी पलसँग ६–२, ६–४ ले पराजय बेहोरेको थियो।
खेलपछि मुर्रे भावुक देखिएका थिए। आँखाभरि आँसु पार्दै कोर्टबाट बाहिरिएका उनले आफू सन्न्यासका लागि पहिलेदेखि नै मानसिक रूपमा तयारी अवस्था रहेको बताए।
‘अन्तिम खेल खेल्दा भावनात्मक रूपमा भावुक भइँदो रहेछ। तर, म यसमा खुसी छु। मैले आफ्नो खेल जीवनको अन्त्य ओलम्पिकबाट गर्न पाएँ,’ उनले भने। पूर्वविश्व नम्बर एकसमेत रहेका मुर्रेले यसअघि नै पेरिस ओलम्पिक आफ्नो अन्तिम खेल हुने बताइसकेका थिए।
उनले सन् २०१२ को लन्डन र २०१६ को रियो ओलम्पिकको पुरुष एकलमा स्वर्ण पदक जितेका थिए। मुर्रेले सन् २०१२ र २०१६ को ओलम्पिकमा स्वर्णसँगै २०१२ मा यूएस ओपन जितेका थिए।
सन् २०१३ र २०१६ मा विम्बल्डन टेनिसको उपाधि जितेका थिए। उनी सन् २०१६ मा विश्व नम्बर एक बनेका थिए।
