‘नेपाल सुपर एटको लागि सक्षम टिम हो’

काठमाडौँ। नेपाली राष्ट्रिय क्रिकेट टिमका पूर्वमुख्य प्रशिक्षक जगत टमाटाले मोन्टी देसाईंले सम्हालेको नेपाली टिम आईसीसी टी–२० विश्वकप २०२४ को ‘सुपर एट’मा प्रवेशको लागि सक्षम रहेको बताएका छन्।

नेपाली टिमले ६ वर्षअघि ओडीआई (एक दिवसीय अन्तर्राष्ट्रिय) मान्यता पाउँदाका टिम सम्हालेका टमाटाले खेलपाटीसँग भने, ‘टी–२० क्रिकेटमा ठूला वा साना टिम केही भन्न सकिँदैन। अहिलेको हाम्रो टिमले राम्रो तयारी गरेको छ। टेस्ट खेल्ने देशका टिमसँग पनि खेलेको छ। खेलाडीहरूले राम्रो एक्सपोजर पाएका छन्। त्यसैले हाम्रो टिम विश्वकप २०२४ मा सुपर एटको लागि सक्षम छ।’

नेपालले दोस्रोपल्ट टी–२० विश्वकप खेल्न लागेको हो। नेपालले पहिलोपल्ट सन् २०१४ मा विश्वकप खेल्दा पुबुदु दसानायके मुख्य प्रशिक्षक थिए भने सहायक प्रशिक्षकको जिम्मेवारीमा टमाटाले निर्वाह गरेका थिए।

त्यसबेला नेपालले हङकङ र अफगानिस्तानलाई पराजित गर्दै बंगलादेश समान ४ अंक बनाएको थियो। घरेलु टिम बंगलादेशसँग नेट रनरेटमा पछाडि परेपछि नेपाल पहिलो चरणबाटै बाहिरिएको थियो।

टी–२० विश्वकपको नवौँ संस्करण अमेरिका र वेस्ट इन्डिजले संयुक्त रूपमा आयोजना गर्दैछ। जुन २ देखि २९ सम्म सञ्चालन हुने विश्वकपमा प्रतिस्पर्धा गर्ने तयारीमा नेपाली टिम अमेरिकास्थित ह्युस्टनमा रहेको छ।

२० टिमले प्रतिस्पर्धा यो विश्वकपमा नेपाल दक्षिण अफ्रिका, श्रीलंका, बंगलादेश र नेदरल्यान्ड्स रहेको समूह ‘डी’ मा रहेको छ। चार समूहका शीर्ष दुई टिम ‘सुपर एट’मा प्रवेश गर्नेछन्।

यसपालि जिम्बाब्बेबाहेक टेस्ट मान्यता प्राप्त सबै (१२) देशले विश्वकप खेल्दैछन्। बाँकी ८ टिम छनोट पारेका गरेका अन्तर्राष्ट्रिय क्रिकेट परिषद् (आईसीसी) का ‘एसोसिएट’ सदस्य छन्।

नेपालले समूह चरणमा अर्को ‘एसोसिएट’ टिम नेदरल्यान्ड्सविरुद्ध ४ जुनमा टेक्सास, अमेरिकामा खेल्दै विश्वकप यात्रा थाल्नेछ। त्यसपछि ११ जुनमा श्रीलंका, १४ जुनमा दक्षिण अफ्रिका र १६ जुनमा बंगलादेशविरुद्ध खेल्ने छ। 

यू–१९ टिमलाई चारपल्ट विश्वकप खेलाएका प्रशिक्षक टमाटा यसपालि ‘एसोसिएट’ टिमले टेस्ट खेल्नेविरुद्ध केही अनपेक्षित नतिजा निकाल्दै विश्वकपलाई रोमाञ्चक बनाउनेमा विश्वस्त छन्।

विश्वकपको सन्दर्भमा उनीसँग गरिएको छोटो संवादको लागि यो ‘लिंक क्लिक’ गर्नुहोला :