प्रिन्स र रशिला फाइनलमा

विराटनगर । प्रिन्स दाहाल र रशिला महर्जन राष्ट्रपति कप जुनियर अन्तराष्ट्रिय ब्याडमिन्टन प्रतियोगिताको फाइनलमा प्रवेश गरेका छन् ।

सहिद रङ्गशालास्थित कभर्डहलमा बिहिबार प्रिन्सले यु–१९ एकलतर्फ रुकेश महर्जनलाई २१ - १३, २१ - १७ ले हराएर फाइनलमा स्थान बनाए । यस्तै यु–१५ तर्फ प्रिन्सले हिमाल चन्दलाई २१-६, २१- २ को सेटमा हराएर फाइनलमा स्थान बनाए ।

यस्तै रशिला यु–१९ एकल र युगल तथा यु–१५ गरि तीन विधामा उपाधी नजिक पुगेकी छिन् । रशिलाले यु–१९ मा रञ्जना भट्टलाई २१ - ९, २१ - १२ ले पाखा लगाउँदै फाईनलमा जेशिका गुरुङ्गसंगको भेट पक्का गरेकी हुन् । जेशिकाले सिमा राजबंशीलाई २१ - १२, २१ - ६ ले पराजित गरेकी हुन् ।

यु–१५ तर्फ पनि रशिलाले रोज पाण्डेमाथि २१ - ७, २१ - ५ ले जित निकाल्दै फाईनल प्रवेश गरिन् । यस्तै यु–१९ तर्फ पनि रशिला फाईनल प्रवेश गरिन् । जेशिका गुरुङ्गसंगको जोडी बनाएकी रशिलाले सेमिफाईनलमा बिश्ना बिष्ट र स्मृती राईको जोडीबाट वाक ओभर प्राप्त गर्दै उपाधी नजिक पुगेकी हुन् ।

मोरङ्ग जिल्ला ब्याडमिन्टन संघको आयोजनामा भएको प्रतियोगिताको यु–१९ ब्वाईज एकल तर्फ शिर्ष बरियताका प्रफुल महर्जन पविन लिनथेपलाई २१ - ११, २१ - ११ को सोझो सेटमा पराजित गर्दै फाईनल यात्रा तय गर्न सफल भएका छन् । अब उनले उपाधीका लागि प्रिन्स दाहालको सामना गर्ने छन् । प्रिन्स दोहा ईन्टरनेशनल जुनियर ब्याडमिन्टनका उपाधी बिजेता हुन् ।

प्रतियोगिताको यु–१५ गल्र्स तर्फको खेलमा बिश्ना बिष्ट घुँडामा चोटका कारण खेल खेल्न नसकी रिटायर्ड भएका कारण स्मृती राईले फाईनल यात्र शुखद बनाईन् । ५ - ३ को अग्रता लिईरहेको अवस्थामा बिश्नालाई घुँडाके चोट बल्झेको थियो । अव स्मृतीले रशिलासंग उपाधीका लागि भिड्ने छिन् । ब्वाईजको सोहि विधा तर्फ म्यानमारका ज लिन थु नेपालका रोशन साउदलाई २१ - ४ र २१ - १५ ले पाखा लगाउँदै उपाधीका लागि प्रिन्स संगको भेट पक्का गरे ।

यु–१९ गल्र्स युगल तर्फको खेलमा सिमा राजबंशी र निता लम्सालको जोडी फाईनल प्रवेश गरे । अव उनीहरुले जेशिका र रशिलाको जोडी संग फाईनलमा प्रतिस्पर्धा गर्ने छन् । सिमा र निताको जोडीले रञ्जना भट्ट र रोज पाण्डेको जोडीलाई २१ - १३, २१ - १३ को समान अन्तरले पन्छाएका हुन् ।

ब्वाईज तर्फ प्रफुल महर्जन र रुकेश महर्जनको जोडी फाईनल प्रवेश गरे । महर्जन जोडीले पेम्बा शेर्पा र प्रियान्सु क्षेत्रीको जोडीलाई २१ -१०, २१ -११ ले पराजित गर्दै फाईनलमा म्यानमारका खेलाडीहरुसंग प्रतिस्पर्धा गर्ने भएका छन् । अर्को खेलमा म्यानमारका खेलाडीहरु ज लिन थु र थु रिनको जोडीले नेपालका पविन लिनथेप र दिवश बिश्वकर्माको जोडीलाई २१ - १८, २१ -१४ ले पराजित गरे ।