मुस्ताफिजुरबिनाको चेन्नई, बलिङमा धार नलागेको हैदराबाद

काठमाडौँ। तीव्र गतिका बलर मुस्ताफिजुर रहमानको अनुपस्थितिमा चेन्नई सुपर किंग्सले इन्डियन प्रिमियर लिग (आईपीएल)मा शुक्रबार सनराइजर्स हैदराबादको सामना गर्दैछ।

अन्तिम खेलमा दिल्ली क्यापिटलसँग २० रनले पराजित भएपछि चेन्नईको टोली विजयी लयमा फर्किने लक्ष्यमा हुने छ।

चेन्नईका कप्तान ऋतुराज गायकवाडले पछिल्लो खेलमा हारपछि बोल्दै धेरै लामो प्रतियोगिता भएको भन्दै प्रदर्शनमा उतारचढाव आउने बताएका थिए।

चेन्नईले शुरूका दुई खेलमा उत्कृष्ट प्रदर्शन गरेको थियो। रोयल च्यालेन्जर बेंगलुरूलाई उद्घाटन खेलमा ६ विकेटले पराजित गरेको चेन्नईले दोस्रो खेलमा गुजरात टाइटन्सलाई ६३ रनले हराएको थियो। 

तर, तेस्रो खेलमा भने चेन्नईले उक्त लय समात्न सकेन। १९२ रनको लक्ष्य पछ्याएको चेन्नईले निर्धारित २० ओभरमा ६ विकेट गुमाउँदै १७१ रन मात्रै बनाएको थियो।

यस खेलका कप्तान ऋतुराज र उनका ओपनिङ पार्टनर रचिन रवीन्द्र दिल्लीविरुद्ध चल्न सकेका थिएनन्। उनीहरूलाई खालिल अहमदले पेभिलियन फर्काएका थिए।

क्रिकेट प्रेमीहरू महेन्द्रसिंह धोनीलाई आठौँ नम्बरमा ब्याटिङ गरेको हेर्न चाहन्थे। उनले अन्तिममा आफ्नो पुरानो फिनिसर फर्म  देखाएर १६ बलमा ३७ रन बनाएका थिए।

शिवम दुबे र समीर रिजवीले फिनिसरको भूमिका निर्वाह गरिरहेको कारण यसअघिका दुई खेलमा धोनी ब्याटिङमा उत्रिन परेको थिएनन्। तर, दिल्लीविरुद्धको खेलमा भने दुबेले १८ रन बनाउँदा समीर गोल्डेन डकआउट हुन पुगे।

अमेरिका र वेस्ट इन्डिजमा आयोजना हुने टी–२० विश्वकपका लागि भिसा प्रक्रिया पूरा गर्न मुस्तफिजुर बंगलादेश फर्केपछि बलिङमा चेन्नईले कम्बिनेसनमा विचार गर्नुपर्ने छ।

बंगलादेशका यी बायाँ हाते तीव्र गतिका बलर र श्रीलंकाका माथीशा पाथिरानाको जोडीले चेन्नईका लागि राम्रो प्रदर्शन गरिरहेका थिए। 

मुस्तफिजुरले ३ खेलमा १५.१४ को औसत र ८.८३ को इकोनोमीमा ७ विकेट लिएका थिए। बैंगलुरूविरुद्ध आफ्नो पहिलो खेलमा उनले ४ विकेट लिए। आईपीएल २०२४ को अक्सनमा बिक्री भएका उनी एक मात्र बंगलादेशी क्रिकेटर हुन्। 

मुस्तफिजुरको स्थानमा मुकेश चौधरीलाई टोलीमा समावेश गरिएको छ भने शार्दूल ठाकुरले एक खेल पनि खेलेका छैनन् । अर्कोतर्फ हैदराबादलाई घरेलु मैदानमा जित हासिल गर्ने मौका हुनेछ। 

मुम्बई इन्डियन्सविरुद्धको दोस्रो खेलमा हैदराबादका ब्याट्सम्यानले आईपीएलको इतिहासमै सर्वाधिक रन (२७७) बनाएका थिए। तर, ओपनर मयंक अग्रवालले अहिलेसम्म आफ्नो लय समात्न सकेका छैनन् । 

कोलकाता नाइट राइडर्ससँग राम्रो प्रदर्शन गर्दागर्दै ४ रनले पराजित भएको हैदराबादका ब्याट्सम्यान गुजरात टाइटन्सविरुद्ध भने चल्न सकेका थिएनन्।

अब्दुल समद र अभिषेक शर्माले २९/२९ रन बनाउँदा हेनरिक क्लासेन २४, शाहबाज अहमद २२, ट्राभिस हेड १९, एडेन मार्कराम १७ र मयंक अग्रवाल १६ रनमा आउट भएका थिए।

बलिङमा जयदेव उनादकट, मयंक मार्कण्डेय र भुवनेश्वर कुमार महँगा साबित भएका थिए।  जयदेवले ३.१ ओभर बलिङ गर्दै १०.४२ को इकोनोमीमा ३३ रन खर्चिएका थिए।

मयंकले ११ को इकोनोमीमा ३३ र भुवनेश्वरले ६.७५ को इकोनोमीमा २७ रन खर्चिएका थिए। मयंकले एक विकेट हात पारेका थिए।

भुवनेश्वरले नयाँ बलमा आफ्नो लय समात्न सकेका छैनन्। उनले ३ खेलमा मात्र ३ विकेट लिएका छन्। कप्तान प्याट कमिन्सले प्रतिओभर ८ का दरले रन खर्चेका छन्। तर, उनलाई अर्को एन्डबाट साथ दिने बलरको अभाव खड्किएको छ।