कर्णाली प्रदेशका खेलाडीको छुट्टै पोसाक तयार

काठमाडौं । कर्णाली प्रदेश खेलकुद विकास परिषद्ले आफ्ना प्रदेशका खेलाडीका लागि छुट्टै खेल पोसाक तयार गरेको छ । राष्ट्रिय र अन्तर प्रदेश स्तरमा कर्णालीबाट सहभागीता जनाउने खेलाडीका लागि प्रदेश खेलकुदले छुट्टै खेल पोसाक तयार पारेको हो । 

कर्णाली प्रदेश खेलकुद विकास परिषद्का सदस्य सचिव विश्वमित्र संन्जेलले बुधबार प्रदेशले तयारी पारेको खेल पोसाक राष्ट्रिय खेलकुद परिषदलाई हस्तान्तरण गरेका छन् । काठमाडौंको त्रिपुरेश्वरस्थित राखेप केन्द्रिय कार्यालयमा सदस्य सचिव टंकलाल घिसिङलाई भेट गरि कर्णाली प्रदेशका सदस्य सचिव संन्जेलले दुई वटा गेम सेटको जर्सी हस्तान्तरण गरेका हुन् । 

सदस्य सचिव संन्जेलले संघीयताका मर्म अनुसार प्रदेशले आफ्नै खेल पोसाक तयार गरेर दशौं राष्ट्रिय खेलकुदको तयारीमा अघि बढेको बताए । उनले खेलाडीको पोसाक सम्बन्धि विभिन्न खेलकुद प्रतियोगिता निर्देशिकामा व्यवस्था भएकाले सोही अनुसार कर्णाली प्रदेशले आफ्नो छुट्टै खेल जर्सी तयार गरेको उल्लेख गरे । 

‘राष्ट्रिय खेलकुद प्रतियोगिता संचालन सम्बन्धि निर्देशिका र राष्ट्रपति रनिङ शिल्ड संचालन सम्बन्धि निर्देशिकामा सहभागी टिमको छुट्टै खेल पोसाक हुने व्यवस्था छ ।’ संन्जेलले भने, ‘प्रदेशले आफ्ना खेलाडीको खेल पोसाक तयार गरेर प्रतियोगितामा सहभागी बन्दा प्रदेशको गौरव र शान पनि बढ्ने र खेलाडीले समेत प्रदेशको गौरवका साथ प्रतिस्पर्धामा उत्रन प्रेरणा मिल्छ ।’ 

प्रदेशको आफ्नै खेल पोसाक तयार गरेर अघि बढ्ने कर्णाली पहिलो प्रदेश बनेको छ । कर्णालीले खेलाडीको गेम जर्सी र खेलाडीको मार्चपास पोसाक आफ्नो मौलिकता झल्कने गरि तयार गरेको छ । 

खेलाडी गेम जर्सी कर्णालीमा पाईने बहुमुल्य जडिबुटी यार्सागुम्बा, दुर्लभ जनावर याक र धार्मिक पर्यटकीइ क्षेत्र हिमाल, रारा, पंचदेवल, काक्रेबिहार र कर्णाली नदिको चिनारी अंकित निको आकाशे रंग र रातो नेपाली झण्डा रंगमा तयार गरिएको छ । 

खेलाडी मार्चपासमा पोसाकमा कर्णालीमा उत्पादन हुने अल्लो तथा भाँगोको रेशाबाट बनेको आफ्नो मौलिकताको सफारी सुट, ह्याट र बेल्ट सेट तयार गरिएको छ । 

सदस्य सचिव संन्जेलले अब हरेक राष्ट्रिय र अन्तर प्रदेशका प्रतियोगितामा आफ्ना खेलाडी प्रदेशको गेम जर्सी र मार्चपास पोसाक सहित उपस्थित हुने बताए । उनले चाँडैनै प्रदेश खेलाडीले लगाउने पोसाकको 'ड्रेस कोड' पनि सार्वजनीक गरिने जानकारी दिए । 

कर्णालीको गेम जर्सी लिदै सदस्य सचिव घिसिङले यो अग्रसरताका लागि कर्णाली प्रदेशलाई बधाई दिए ।

उनले खेलकुदमा पोसाकको विशेष महत्व हुने उल्लेख गर्दै कर्णाली प्रदेशले तयार गरेको खेल पोशाक ऐतिहासिक कदम भएको बताए । 

कार्यक्रममा राखेपका बोर्ड सदस्य सम्राट कुसारी सहित राखेपका विभागीय प्रमुखहरुको उपस्थिती रहेको थियो ।