काठमाडौं । इंग्लिस प्रिमियर लिग क्लब लिभरपुलका व्यवस्थापक जर्गेन क्लोपले यो सिजन सन् २०२३–२४ को अन्त्यसँगै ‘ऊर्जाविहिन भएको’ भन्दै आफ्नो भूमिकाबाट अलग्गिने बताएका छन् ।
जर्मन प्रशिक्षक जर्गेन क्लोपले यो सिजन सन् २०२३–२४ को अन्त्यसँगै लिभरपुल छाड्ने घोषणाले फुटबल जगतलाई तरंगित बनाएको छ, जसलाई पत्याइहाल्न गाह्रो भइरहेको छ । तर, अर्को ठूलो प्रश्नको जवाफ खोज्ने क्रम सुरु भइसकेको छ– क्लोपको स्थान कसले लिने छन् ?
अक्टोबर, २०१५ देखि एन्फिल्ड टिम हाँकिरहेका क्लोपको उत्तराधिकारी लिभरपुलले टुंगो लगाएको छैन भने उसलाई नयाँ प्रशिक्षक-व्यवस्थापकबारे निर्णय गर्न अझै पनि केही महिना समय उपलब्ध छ । क्लोपको उत्तराधिकारीको रुपमा लिभरपुलकै पूर्वखेलाडी जाभी अलोन्सो मुख्य दाबेदार हुनसक्छन् । यो सिजन बुन्डेसलिगामा बायर लेभरकुजनको उत्कृष्ट प्रदर्शन गरेपछि उनी मुख्य दाबेदारको रुपमा उभिएका हुन् ।
४२ वर्षीया अलोन्सो स्पेनले सन् २०१० को विश्वकप तथा २००८ र २०१२ को युरोपियन च्याम्पियनसिपको उपाधि जित्दा टिमका महत्वपूर्ण मिडफिल्डर थिए । उनले सन् २००४ देखि २००९ सम्म लिभरपुलको जर्सीमा २ सय १० खेल खेलेका थिए । त्यस अवधिमा उनले च्याम्पियन्स लिग, एफए कप र युईएफपए सुपर कपको उपाधि जितेका थिए ।
स्पेनी क्लब रियल सोसिडाड, आइबर, रियल म्याड्रिड तथा जर्मन महारथी बायर्न म्युनिखबाट समेत खेलेका अलोन्सो सन् २०१७ मा खेल जीवनबाट सन्यास लिएपछि प्रशिक्षकको भूमिकामा अगाडि बढेका हुन् । उनले स्पेनी ला लिगा र जर्मन बुन्डेसलिगाको उपाधि पनि जितेका छन् ।
रियल म्याड्रिडको युथ टिम र रियल सोसिडाडको बी टिमलाई सेगुन्डा बी स्पेनी फुटबलमा तेस्रो डिभिजन सम्हालेपछि पहिलोपल्ट सिनियर टिम सम्हाल्दै अक्टोबर २०२२ मा जर्मनीको बायर लेभरकुजन पुगेका थिए । उनले गत अगस्टमा सन् २०२६ सम्मको लागि लेभरकुजनमा बस्ने सम्झौता गरेका थिए ।
अहिले बुन्डेसलिगाको शीर्षस्थानमा रहेको लेभरकुजन डिफेन्डिङ च्याम्पियन बायर्न म्युनिखभन्दा चार अंक अगाडि छ । अपराजित रहेको उसले १८ खेलबाट ४८ अंक जोडेको छ । उसले बायर्न, बोरुसिया डर्टमुन्ड र भीएफबी स्टुटगार्टसँग मात्रै अंक बाँडेको छ ।
