खेलाडीलाई मछिन्द्रको तीन महिने ‘कन्ट्रयाक’

काठमाडौं । ए डिभिजनको मछिन्द्र फुटबल क्लबले खेलाडीलाई तीन महिनाको सम्झौता दिएको छ । मोफसलका प्रतियोगितालाई लक्षित गर्दै मछिन्द्रले खेलाडीलाई तीन महिने सम्झौताको अवधि दिएर अनुबन्धन गरेको हो । 

यस वर्ष ए डिजिभन लिग नहुने निश्चित जस्तै भएपछि क्लबहरुले खेलाडीलाई लामो समयको कन्ट्रयाक दिएका छैनन् । अधिकांश खेलाडी प्रति खेलका आधारमा पारिश्रमिक लिने गरि क्लबसँग आबद्ध भएका छन् । 

मछिन्द्रले भने मोफसलका नकआउट प्रतियोगितालाई केन्द्रित गर्दै खेलाडी अनुबन्धन गरेको हो । 

‘एउटा खेलाडीले हरेक प्रतियोगिता फरक–फरक क्लबको जर्सी लगाएर खेल्दा राम्रो देखिदैन । यसले फुटबल, क्लब र फुटबललाईनै राम्रो गर्दैन ।’ क्लबका उपाध्यक्ष अनिल श्रेष्ठले भने, ‘लिगको टुङ्गो नभएपनि खेलाडीलाई अहिले तीन महिनाको कन्ट्रयाकमा राखेका छौं । चैतसम्म मोफसलका प्रतियोगितामा क्लब र खेलाडीलाई ब्यस्त राख्ने योजना छ ।’

फ्रेन्चाईज फुटबल नेपाल सुपर लिग खेलेपछि खेलाडीहरु अहिले क्लबहरुको सम्झौता बाहिर छन् । लिगको तालिका सार्वजनीक नहुँदा क्लबहरुले समेत खेलाडी अनुबन्धन गरेका छैनन् । एनएसएलमा माथिल्ला स्तरका खेलाडीले अवसर पाएपनि लिग फुटबल नहुँदा डिभिजन फुटबल खेल्ने खेलाडी बेरोजगार छन् । खेलाडीहरु मोफसलमा हुने गोल्डकपमा प्रति खेलमा पारिश्रमिक लिने गरि विभिन्न क्लबबाट खेलिरहेका छन् ।  

‘खेपमा जसरी खेल्दा खेलाडीमा चोटको जोखिम पनि रहन्छ । लिग नहुने भएपनि खेलाडीलाई आर्थिक हिसाबले केही समयका लागि मात्र भएपनि जोगाऔं भन्ने उद्धेश्यले तीन महिनाको कन्ट्रयाक दिएका छौं ।’ मछिन्द्रलाई दुई पटक लिग विजेता बनाएका श्रेष्ठले भने ।

मछिन्द्रले घरेलु फुटबलमा स्टार खेलाडीको पहिचान बनाएका बिमल घर्तिमगर सहित, मनिष डाँगी, देबेन्द्र तामाङ, बिशाल श्रेष्ठ, आशिष चौधरी लगायतलाई सम्झौतामा राखेको छ । मोफसलका प्रतियोगितामा बलियो टिम उतार्ने मछिन्द्रको योजना छ । 

‘नेपाली फुटबललाई बचाएकै मोफसलले हो कि जस्तो देखिन्छ । लिगको टुङ्गो हुदैन, तर मोफसलको प्रतियोगिता समयमा हुन्छ । मछिन्द्रले खेलाडीमा गरेको लगानी मोफसलको फुटबललाई सम्मान गर्नका लागि पनि हो ।’ अनिलले थपे ।

पोखरामा हुने आहा रारा गोल्डकपमा मछिन्द्रले माघ ११ गते जावलाखेलसँग खेल्दै मोफसलको यात्राको सुरुवात गर्नेछ ।