राष्ट्रिय मिक्स रिले दौडको सम्पुर्ण तयारी पुरा

काठमाडौं । कीर्तिमानी धावक बैकुण्ठ मानन्धरको सम्मानमा आयोजना गरिएको राष्ट्रिय मिक्स रिले दौड प्रतियोगिताको सम्पुर्ण तयारी पुरा भएको छ ।

एथलेटिक्स परिवार नेपालको आयोजनामा भोलि शनिबार दशरथ रंगशालाबाट सञ्चालन हुने प्रतियोगिताको सम्पुर्ण तयारी पुरा भएको आयोजकले जनाएको हो ।

परिवारका अध्यक्ष राजन खत्रीले प्रतियोगितामा खेलाडीको सहभागीता उत्साहजनक देखिएको बताउनुभयो । उहाँले भन्नुभयो, ‘नेपालमा पहिलो पटक फरक प्रकारको एथलेटिक्सको कार्यक्रम हुन लागेको हो । महिला खेलाडीको एथलेटिक्समा सहभागीता बढोस् भन्ने रहेको छ ।’

प्रतियोगितामा सहभागीताका लागि २१ वटा टिमका २ सय ५० भन्दा खेलाडीले नाम दर्ता गराएको प्रतियोगिता ब्यवस्थापनको जिम्मेवारी लिएको प्रो स्पोर्टस्का अध्यक्ष रबिन्द्र थापाले बताउनुभयो ।   
मिक्स रिले सहित ६ स्पर्धालाई कार्यक्रममा समावेश गरिएको छ ।

प्रतियोगितामा दश किलोमिटरको मिक्स रिले, पुरुष महिला खुल्ला ५ किलोमिटर दौड, भेट्रान महिला ३५ वर्षमाथि ५ किलोमिटर दौड, भेट्रान पुरुष ४१ देखि ५० वर्षसम्म र ५१ वर्षभन्दा माथि उमेर समूहको दौडलाई समावेश गरिएको छ ।

मिक्स रिलेको टिममा समान दुई महिला र दुई पुरुष खेलाडी हुनेछन् । प्रत्येक खेलाडीले २ किलोमिटर ५ सय मिटर दौडनुपर्नेछ । सबै स्पर्धा दशरथ रंगशालाबाट सुरु भएर सोही स्थानमा आएर टुङ्गिनेछ । विजेता खेलाडीलाई नगद पुरस्कार सहित मेडल, प्रमाणपत्रको व्यवस्था गरिएको आयोजकले जनाएको छ ।

राष्ट्रिय खेलकुद परिषद् राखेपका उपाध्यक्ष शिव कोईरालाले प्रमुख अतिथीको रुपमा कार्यक्रमलाई उद्घाटन गर्नेछन् ।

यस कार्यक्रममा कीर्तिमानी धावक बैकुण्ठ मानन्धर र एसियन क्रश कन्ट्रीका च्याम्पियन दिपक अधिकारलाई सम्मान गरिने परिवारका अध्यक्ष खत्रीले जानकारी दिनुभएको छ ।