पोखरा । स्याङजाको कोल्मामा सम्पन्न क्रस कन्ट्री दौडको उपाधि आर्मीका गोपाल तामाङले जितेका छन् ।
सात सय कोल्मा बहाकोट सम्पर्क मञ्चले आयोजना गरेको चौथो संस्करणको क्रसकन्ट्री दौडमा आर्मीका धावकले बर्चश्व जमाउँदा गोपालले पहिलो स्थान हासिल गरे । आर्मीकै सञ्जय श्रेष्ठ र सुशील कुमार शाही क्रमश दोस्रो र तेस्रो भए ।
निर्धारित २५ किलोमिटरको दुरी गोपालले १ घण्टा ३१ मिनेट ५६ सेकेन्डमा पार गरेका हुन् । उनले उपाधिसँगै नगद ५० हजार, ट्रफी, मेडल र प्रमाणपत्र प्राप्त गरे । दोस्रो बनेका आर्मीका सञ्जयले १ घण्टा ३३ मिनेट ४३ सेकेण्डको समय र तेस्रो बनेका सुशीलले १ घण्टा ३४ मिनेट २ सेकेन्डको समय लगाए । सञ्जयले ४० हजार र सुशीलले ३० हजार रुपैयाँ सहित ट्रफी, मेडल, प्रमाणपत्र प्राप्त गरे ।
![](https://demo.khelpati.com/uploads/editor/2023-12-24/070216891cross country news photo.jpg)
यस्तै, २१ वर्ष मुनिको १० किलोमिटर पुरुष खुल्ला दौडतर्फ तनहुका सनम गुरुङले ४१ मिनेट १४ सेकेन्डमा पार गर्दै उपाधि हात पारे । उपाधिसंगै गुरुङले ३० हजार रुपैयाँ सहित ट्रफी, मेडल र प्रमाणपत्र प्राप्त गरे । पोखराका तेन्जेन रोका उपबिजेता बन्न पुगे । उनले २० हजार रुपैयाँ प्राप्त गरे । पोखराकै मनोज रोका तेस्रो बन्दै १० हजार रुपैयाँ हात पारे ।
महिला ५ किलोमिटर दौडको उपाधि जुम्लाकी राममाया बुढाले हात पारिन् । निर्धारित दुरि २१ मिनेट १८ सेकेण्डमा पार गर्दै राममायाले उपाधि सहित नगद १५ हजार रुपैयाँ प्राप्त गरेकी हुन् । दाङका सुस्मिता कुमारी चौधरी दोस्रो र पोखराकी नितु तामाङ तेस्रो बन्दै क्रमश १० हजार र ५ हजार रुपैयाँ सहित ट्रफी, मेडल, प्रमाणपत्र प्राप्त गरे ।
प्रतियोगिताका बिजेतालाई बन्जी नेपाल पोखराले बन्जीको निशुल्क टिकट उपलब्ध गराएको छ । प्रतियोगितामा ११ वर्षीय एन्जिला जिटी सबैभन्दा कम उमेर र ५८ वर्षीय गोविन्द नेपालीले सबैभन्दा बढी उमेरको धावकको रुपमा सहभागीता जनाएका थिए ।
प्रतियोगिताका बिजेताहरुलाई गण्डकी प्रदेशका सामाजिक बिकास तथा स्वास्थ्य मन्त्री सुशिला सिंखडा, गण्डकी प्रदेशका पुर्व मन्त्रीहरु दिपक चर्ती मगर, मेखलाल श्रेष्ठ, गण्डकी प्रदेशका पुर्व सांसद मीन प्रसाद गुरुङ लगायतले पुरस्कार वितरण गरेका थिए । कार्यक्रममा सातौ दक्षिण एसियन कराँते खेलमा कुमिते क्याटगोरीमा स्वर्णपदक बिजेता तनहु देवघाट ५ का पार्वती गुरुङलाई सम्मान गरिएको थियो ।