पोखरा । पश्चिमाञ्चल क्षेत्रिय खेलकुद विकास समिति, पोखराको बोर्ड हटाउन प्रदेश खेलकुद परिषद गण्डकीले निर्देशन दिएको छ । परिषदले एक पत्र लेख्दै बोर्ड हटाउन र सोको जानकारी यथासिघ्र प्रदेश खेलकुद परिषदमा दिन निर्देशन दिएको हो ।
परिषदका सदस्य सचिव श्रीधर शर्माले पत्राचार गरेको पत्रमा बोर्ड हटाउन तथा कार्यालयबाट कुनै पनि काम कार्वाही नगर्न-नगराउन निर्देशन दिएका छन् ।
राष्ट्रिय खेलकुद ऐन अनुसार स्वतः विघटन हुनुपर्ने क्षेत्रिय खेलकुद विकास समितिमा कार्यरत कर्मचारीको व्यवस्थापन हुन नसक्दा राष्ट्रिय खेलकुद परिषद (राखेप)ले क्षेत्रिय खेलकुद विकास समितिमार्फत नै कामकाज अघि बढाइरहेको थियो ।
राखेपको गत भदौ मा बसेको ११७ औं बोर्ड बैठकले क्षेत्रिय खेलकुद विकास समिति अन्तर्गत रहेका सबै खेलकुद पूर्वाधारहरु र कर्मचारीहरु समेत प्रदेश खेलकुद परिषदमा रहने गरि निर्णय गरेको थियो ।
सोही निर्णयलाई आधार मान्दै परिषदले तत्काल सो निर्णय कार्यान्वयन गर्न राखेपलाई अनुरोध गरेको सदस्य सचिव शर्माले बताए ।
उनले भने, 'म आफू पनि रोखपको बोर्ड सदस्य भएको नाताले पटक–पटक यो विषय कार्यान्वयन गर्न राखेप सदस्य सचिवज्यूलाई आग्रह गरे । उहाँले पनि सो निर्णय कार्यान्वयन गर्न विभागिय प्रमुखलाई निर्देशन दिनु भयो । तर विभागिय प्रमुखले निर्णय कार्यान्वयन गर्न चासो देखाएनन् ।'
शर्माले आफूले समेत पटक–पटक प्रमुखलाई यस बारे सचेत गराएको बताए ।
बोर्ड बैठकले क्षेत्रिय खेलकुदमा कार्यरत कर्मचारीहरु ओएनएम स्विकृति नभए सम्मका लागि प्रदेश खेलकुद विकास समिति अन्तर्गत समायोजन गर्न र खेलकुद पूर्वाधारहरुको सुरक्षा, सञ्चालन र व्यवस्थापन प्रदेश खेलकुद परिषदले गर्ने गरि हस्तन्तरण गर्ने निर्णय गरिएको थियो ।
'निर्णय कार्यान्वयन गर्न ढिलाई भएकोले परिषदले सो निर्णयको प्रतिलिपी पठाउन राखेपलाई समेत पत्रचार गरेका छौं ।' सदस्य सचिव शर्माले भने ।
सदस्य सचिव शर्माले भने, '१९ औं एसियाली खेलकुद सकिएको १५ दिन भित्रै निर्णय कार्यान्वयन गर्न भनिएको थियो । तर कार्यान्वयन गर्न निकै आलटाल गरियो । हामी खेलकुदमा पक्कै पनि झारा टार्न आएका होइनौं । खेलकुदको विकास संगै नेपालको संघिय ऐन खेलकुदमा समेत लागु गर्नुपर्छ भन्ने उद्धेश्यका साथ आएका हौं ।” उनले थपे “ती विषय कार्यान्वय गर्न प्रदेश खेलकुद विकास ऐन २०७७ र प्रदेश खेलकुद विकास नियमावली २०७८ समेत निर्माण गरी लागु गरिसकेका छौं । हामी त्यसमा प्रतिवद्ध छौं ।'
प्रदेश खेलकुद परिषदको कार्यकारी समितिको बैठकले पोखरा रंगशालासहित प्रदेशका सबै खेलकुद संरचनाहरुको सञ्चालन, व्यवस्थापन र संरक्षणका लागि मापदण्ड निर्माण गरि कार्यान्वयन गर्न निर्णय गरिसकेको बताउँदै सदस्य सचिव शर्माले सो अनुसार व्यवस्था मिलाउन जिल्ला खेलकुद विकास समितिलाई समेत निर्देशन गरिएको बताए ।
