काठमाडौं । अखिल नेपाल फुटबल संघ एन्फाले राखेको विशेष साधारण सभा विवादमा फसेको छ । डिभिजन क्लबहरु र जिल्लाहरुको असन्तुष्टिका कारण विशेष साधारण सभा विवादमा परेको हो ।
एन्फाले भदौ २४ गते लेखा परिक्षक नियुक्तिको निर्णय अनुमोदनका लागि भन्दै भर्चुअल बैठक बोलाएको थियो । क्लब र जिल्ला संघले विशेष साधारण सभा बैठक भर्चुअल रुपमा बोलाउने र लेखा परिक्षक नियुक्ति गर्ने सार्वभौम साधारण सभाको अधिकार कार्यसमितिले खासेको भन्दै असन्तुष्टि जनाएका छन् ।
उनीहरुले भर्चुअल रुपमा बोलाईएको विशेष साधारण सभा बैठक अवैधानिक रहेको र यसलाई वहिष्कार गर्ने चेतावनी नेतृत्वलाई दिएका छन् ।
फुटबल संघभित्र देखिदै आएको विभिन्न समूह तथा उपसमूहको अन्तरसंघर्षको दृष्य अब साधारण सभामा देखिने संकेत मिलेको छ । संस्थापन र इतर गरि दुवै समूहले विशेष साधारण सभालाई शक्ति परिक्षणको थलो बनाउने तयारी गरेका छन् ।
‘एन्फा विधानमै साधारण सभाबाट लेखा परिक्षक सम्बन्धि निर्णय गर्ने ब्यवस्था छ । कार्यसमितिबाट निर्णय गराएर सिंगो साधारण सभालाई बाइपास गर्ने काम भएको छ । अहिलेसम्म सार्वजनीक सूचना जारी गरेर लेखा परिक्षक नियुक्त गर्न कुन चिजले रोक्यो ?’ इतर समूहका एक नेताले भने, ‘भर्चुअल रुपमा बैठक बोलाएर अवैधानिक काम गर्न एन्फा उद्धत देखिन्छ । यसले फुटबललाई दुर्घटनाको दिशामा लैजान्छ ।’
क्लबहरुको नयाँ फोरम ‘नेपाल क्लब एसोसियसन’ले औपचारिक रुपमै एन्फामा निवेदन दर्ता गरेर भर्चुअल रुपमा आयोजना गर्न लागिएको विशेष साधारण सभाको विरोध गरेको छ । उसले भौतिक रुपमा सबै सदस्यलाई उपस्थित गराएर साधारण सभा गर्नुपर्ने माग अघि सारेको छ ।
एन्फा प्रवक्ता सुरेस साहले भौतिक रुपमा उपस्थित भएर बैठक आयोजना गर्दा धेरै खर्च हुने भएकाले भर्चुअल रुपमा विशेष साधारण सभा राखिएको दाबी गरे । ‘साधारण सभा बैठक राख्दा करिब ४० लाख रुपैयाँ खर्च हुने रहेछ । एउटा लेखा परिक्षकको अनुमोदन गर्न चालिसौं लाख खर्च गरेर बैठक राख्न भन्दा कार्यसमितिको निर्णय अनुसार भर्चुअल रुपमा साधारण सभा बैठक राखिएको हो ।’ उनले भने, ‘विधान अनुसारनै लेखा परिक्षकलाई दोह¥याउने निर्णय कार्यसमितिले गरेको छ ।’
साधारण सभाको मिति नजिकिदै जादा एन्फाभित्रको अन्तरसंघर्ष उत्कर्षमा छ । इतर समूह संस्थापन पक्षबाट आउने हरेक प्रस्तावलाई साधारण सभाबाट फेल बनाउने प्रयासमा छ । साधारण सभा लगायत एन्फाको आन्तरिक शक्ति संघर्षलाई सन्तुलनमा राख्न ‘पावर सेयरिङ’ गर्नुपर्ने इतर समूहका केही नेताको प्रस्ताव छ । पावर सेयरिङ गरेको खण्डमा मात्र एन्फाका कार्यक्रम र नेतृत्वसँग सहकार्य गर्न सकिने इतर समूहको मनसाय देखिन्छ ।
व्यक्ति र स्वार्थ केन्द्रित फुटबलभित्रको राजनीतिका कारण कोसँग ‘पावर सेयरिङ’ गर्ने भन्ने विषयमा एन्फा नेतृत्वलाई अलमल छ । महासचिव लगायत अन्य पदमा इतर समूहसँग ‘पावर सेयरिङ’ गरेर अघि बढ्न नेतृत्व तयार देखिदैन ।
साधारण सभा लगायत एन्फाका कार्यक्रममा नेतृत्वलाई फेल गराएर दबाब सिर्जना गर्ने इतर समूहको तयारी छ । नेतृत्वले पेलेर अघि बढेको खण्डमा अविश्वासको प्रस्ताव लैजाने सम्मको तयारी इतर समूहले गरेको छ ।
-1734511871.jpeg)
