टाइब्रेकरमा झापा ११ पराजित, एनआरटी सेमिफाइनलमा

अर्जुन काफ्ले, मोरङ, (पथरी)। टाइब्रेकरमा नवयुग श्रेष्ठ चुक्दा झापा ११ पथरीशनिश्चरे गोल्डकप फुटबल प्रतियोगिताबाट बाहिरिएको छ।

मंगलबार भएको पहिलो चरणको अन्तिम खेलमा न्यूरोड टिम (एनआरटी)ले झापा रोमाञ्चक टाइब्रेकरमा ४–२ ले पराजित गर्दै सेमिफाइनलमा स्थान बनाएको हो।

निर्धारित ९० मिनेटसम्म दुवै टोलीले गोल गर्न नसकेपछि खेलको निर्णय टाइब्रेकरबाट गरिएको थियो। टाइब्रेकरमा झापाका नवयुग र पुजन श्रेष्ठका प्रहार एनआरटीका गोलकिपर प्रमिजय गच्छेदारले बचाए। झापाका प्रदीप बुढाथोकी र प्रेम तामाङ मात्र गोल गर्न सफल भए।

एनआरटीका सरोज घिसिङ, सनम लिम्बू, रोहन खड्गी र आकाश राईले सफलतापूर्वक प्रहार गोलमा परिणत गरे। असीम राईको प्रहार झापाका गोलकिपर सन्दीप लिम्बूले रोक्न सफल भए। एनआरटीका गोलरक्षक गच्छेदार ‘म्यान अफ द म्याच’ घोषित भए।

यससँगै पथरीशनिश्चरे गोल्डकपको सेमिफाइनल समिकरण पूरा भएको छ। पहिलो सेमिफाइनल बुधबार पाँचथर क्लब र सिरहाको सलहेश युवा क्लबबीच हुनेछ। दोस्रो सेमिफाइनलमा आयोजक पथरी ११ फुटबल क्लबले एनआरटीसँग प्रतिस्पर्धा गर्नेछ।