काठमाडौं । सातवटै प्रदेश खेलकुद विकास परिषद् हरेक वर्ष अन्तर प्रदेश राष्ट्रिय खेलकुद गर्न सहमत भएका छन् ।
हेटौंडामा सम्पन्न प्रदेश खेलकुद परिषद्का सदस्य–सचिवहरुको बैठकले यस्तो निर्णय गरेको हो । सहमती अनुसार प्रतियोगिता प्रदेशहरुले आलोपालो रुपमा आयोजना गर्ने भएका छन् ।
बागमती प्रदेश खेलकुद विकास परिषद्का अध्यक्ष प्रदेश सामाजिक विकास मन्त्री कुमारी मोक्तानको अध्यक्षतामा बसेको बैठकले प्र्रत्येक बर्ष अन्तर प्रदेश राष्ट्रिय खेलकुद आयोजना गर्नेे निर्णय गरेको सदस्य सचिव सूर्यलाल भण्डारीले जानकारी गराएका छन् ।
प्रथम अन्तर प्रदेश राष्ट्रिय खेलकुद बागमती प्रदेशले आगामी फागुनमा आयोजना गर्दैछ ।
सो प्रतियोगितामा सहभागी हुने प्रदेशहरुले टिम तयारी आफ्नै खर्चमा गर्नेछन् । स्थानिय तहबाट नै खेलाडी छनौट गरि प्रदेश टिम बनाउने गरि छलफल भएको भण्डारीले जानकारी गराए ।
राष्ट्रिय खेलकुद परिषदले आयोजना गर्ने राष्ट्रिय खेलकुदमा प्रदेश सहित विभागीय र अन्य टिमको सहभागिता हुने गर्दछ भने अन्तर प्रदेश खेलकुदमा प्रदेश टिम मात्र सहभागी हुन पाउने छन् ।
प्रथम प्रदेश खेलकुद आयोजनाका लागि बागमती प्रदेशले यस अघिनै निर्णय गरि सकेको छ भने आवश्यक बजेट समेत विनियोजन भई सकेको प्रदेश खेलकुद विकास परिषद् बागमतीले जनाएको छ ।
