हेमन्त र सञ्जयले जुनियर च्याम्पियनसिप खेल्ने  

काठमाडौं । एसियाली जुनियर भारोत्तोलन च्याम्पियनसिपमा दुई खेलाडीले प्रतिस्पर्धा गर्ने भएका छन् ।

भारतको नयाँ दिल्लीस्थित नोयडामा हुने प्रतियोगितामा नेपालबाट दुई खेलाडीले सहभागीता जनाउने भएका हुन् । 

भारत जाने दुई खेलाडी सहित ४ सदस्यीय नेपाली टिमको शुक्रबार बिदाई गरिएको छ । नेपाली टिम आईतबार भारतको नयाँ दिल्ली प्रस्थान गर्ने कार्यक्रम रहेको छ । 

जुलाई २६ तारिखदेखि सुरु भएको प्रतियोगितामा २ पुरुष खेलाडीले नेपालको चुनौती प्रस्तुत गर्ने छन् । ७३ केजीमा हेमन्त पाल तथा ९६ केजीमा सञ्जय यादवले प्रतिस्पर्धा गर्ने छन् ।

हेमन्तले अगष्ट १ तथा सञ्जयले अगष्ट २ तारिखमा खेल्ने छन् । दुवैको यो ‘डेब्यु’ अन्तर्राष्ट्रिय प्रतियोगिता हो ।

प्रशिक्षकमा सञ्जय महर्जन तथा व्यवस्थापकमा रामसुन्दर श्रेष्ठ रहेका छन् ।

टोलीलाई राष्ट्रिय खेलकुद परिषद्का सदस्य–सचिव टंकलाल घिसिङ, नेपाल ओलम्पिक कमिटीका महासचिव निलेन्द्रराज श्रेष्ठ र सचिव रामजीबहादुर श्रेष्ठ तथा नेपाल भारोत्तोलन संघका अध्यक्ष रामकृष्ण श्रेष्ठले शुक्रबार एक कार्यक्रमबीच बिदाइ गरेका थिए ।