काठमाडौं । चीनको हाङझाउमा हुने १९ औं एसियाली खेलकुदमा सहभागी खेल कुस्तीले थप तयारी भारतमा गर्ने भएको छ ।
नेपाल कुस्ती संघले नेपाली टोलीलाई वैदेशिक प्रशिक्षणका लागि भारतको उत्तर प्रदेश पठाउने भएको हो ।
चार खेलाडीसहित ५ सदस्यीय टोलीलाई आईतबार राष्ट्रिय खेलकुद परिषद्का सदस्य–सचिव टंकलाल घिसिङले बिदाई गरेका छन् । उनले एशियाडको राम्रो तयारी गर्न खेलाडीलाई प्रेरित गरे ।
वैदेशिक प्रशिक्षणका लागि जान लागेका चारै खेलाडी १३ औं दक्षिण एसियाली खेलकुदका पदक विजेता हुन् । पुरुष खेलाडीमा सुरेश चुनारा ७४ केजी र राज यादव १२५ केजी तथा महिलामा शिवाङगी दुवे ५७ केजी र सुशिला चन्द ६२ केजी रहेका छन् ।
१३ औं सागमा सुरेश र राजले कांस्य तथा बाँकी दुई खेलाडीले रजत जितेका थिए । प्रशिक्षकमा कुस्तीका मुख्य प्रशिक्षक मुमताज अली इद्रिसी छन् ।
टोली सोमबार काठमाडौंबाट नेपालगन्ज जाने छ । नेपालगन्जमा एक साताको प्रशिक्षणपछि टोली उत्तर प्रदेश जाने छ । उत्तर प्रदेशको नन्दनीनगरस्थित टाटा मोटर्स एकेडेमीमा भदौसम्म खेलाडी प्रशिक्षणमा रहने मुख्य प्रशिक्षक इद्रिसीले जानकारी गराए ।
खेलाडी सुरेशले पहिलो पटक अन्तर्राष्ट्रिय प्रतियोगिताको तयारीका लागि वैदेशिक प्रशिक्षणमा जान पाउदा सबै खेलाडी उत्साहित भएको बताए । नेपालको कुस्ती खेलले एशियाडमा प्रतिस्पर्धा गर्दैछ ।
