काठमाडौं । अखिल नेपाल फुटबल संघ (एन्फा)का पूर्व अध्यक्ष कर्माछिरिङ शेर्पाले क्लबहरुको साझा उद्धेश्य प्राप्तिका लागि नेपाल फुटबल क्लब एसोसियसन गठन गरिएको बताएका छन् । डिभिजन क्लबहरुको संगठन नेपाल फुटबल क्लब एसोसियसनको अध्यक्ष चुनिएका शेर्पाले आफुले राजनीति गर्न क्लब एसोसियसन नबनाएको प्रष्ट पारे ।
‘राजनीतिक स्वार्थ पूर्तिका लागि क्लब एसोसियसन बनाईएको हैन । क्लबहरुको साझा उपलब्धि र परिणाम निकाल्ने गरि काम गर्न संगठनको निर्माण गरिएको हो ।’ शेर्पाले भने, ‘क्लबहरुलाई ब्यवसायीक बनाउने र आर्थिक रुपमा जर्जर अवस्थामा रहेका क्लबलाई उकास्ने यसको मुख्य उद्धेश्य हो ।’
ए, बी र सी डिभिजनका विभागबाहेक ३९ मध्य ३० क्लबको सहभागीतामा नेपाल फुटबल क्लब एसोसियसन गठन भएको छ । पूर्व अध्यक्ष शेर्पाको नेतृत्वमा क्लबहरुले एसोसियसन गठन गरेका हुन् । क्लब एसोसियसन गठन भएपछि फुटबलमा थप राजनीतिकरण हुन सक्ने भन्दै केहीले चिन्ता व्यक्त गरेका छन् ।
‘भर्खरै त गठन भएको छ । कामको नतिजा आउन थालेपछि सबै नकारात्मक प्रचारले जवाफ पनि पाउछ ।’ शेर्पा भन्छन्, ‘हल्ला गर्ने भन्दा कामले नतिजा दिईनेछ ।’
फुटबलको सर्वोच्च निकाय अखिल नेपाल फुटबल संघ (एन्फा) आर्थिक रुपमा संकटमा परेपछि क्लबहरु दायनीय अवस्थामा छन् । एन्फा आर्थिक संकटसँग जुधिरहदाँ ए डिभिजनका क्लबहरुले लिगको तयारी खर्च, म्याच मनी र पुरस्कार रकम समेत पाएका छैनन् । एन्फाले अन्तराष्ट्रिय आर्थिक प्रतिबन्धका कारण क्लबहरुलाई पैसा दिन नसकेको बताउँदै आएको छ ।
करोड बढी लगानी गरेर लिग खेलेका ए डिभिजन क्लबले तयारी खर्च, म्याच मनीनै नपाएपछि खेलाडीलाई तलब दिन सकिरहेका छैनन् । सोही कारण खेलाडीको दैनिकी समेत कष्टकर बन्दै गैरहेको छ । बी र सी डिभिजन लिग अनिश्चित बन्दा फुटबल र क्लबमा लगानी गरेका अधिकांश संस्था र कम्पनीलाई समेत ब्ययभार थपिएको छ ।
