आफैलाई महान खेलाडी भन्न चाहन्न - जोकोभिच

काठमाडौं । सर्बियन टेनिस स्टार नोभाक जोकोभिचले आफु सर्वकालीन महान खेलाडी हो की हैन भन्ने कुरा आफुमा निर्भर नभएको बताएका छन् ।

कीर्तिमानी २३ औं ग्रान्डस्लाम उपाधि जितेपछि सर्बियन जोकोभिचले आफुले आफुलाई महान खेलाडी नभन्ने बताएका हुन् ।

आइतबार राति  फ्रेन्च ओपनको उपाधि जित्दै उनले कीर्तिमानी २३ औं ग्रान्डस्लाम जितेका थिए ।

'म यस छलफलमा प्रवेश गर्न चाहन्न । म आफ्नै इतिहास लेख्दैछु,' ३६ वर्षीय जोकोभिचले भने,'म सर्वकालीन महान हुँ भन्न चाहन्न । म ती छलफलहरू अरू कसैलाई छोड्छु ।'

जोकोभिचले राफायल नाडाललाई पछि पार्दै २३ औं ग्रान्डस्लाम जितेका हुन् ।

तेस्रो पटक फ्रेन्च ओपन जित्ने क्रम उनले कास्पर रुडलाई हराए ।

फ्रेन्च ओपन उपाधिसँगै जोकोभिच विश्व नम्बर एक समेत बनेका छन् ।