भक्तपुर । भक्तपुरको गोल्मढीस्थित युवा टीम भक्तपुरको आयोजनामा शुक्रबारदेखि स्वर्गीय त्रिरत्न ग्वाछा स्मृति खुला रापिड बुद्धिचाल प्रतियोगिता सुरु भएको छ । प्रतियोगिता जेठ १२ र १३ गते दुईदिन हुने छ ।
टिमको कार्यसमिति सदस्य त्रिरत्न ग्वाछाको स्मृतिमा प्रतियोगिता भएको हो । ग्वाछाको झण्डै महिना दिन अघि अल्पआयुमै अकल्पनीय निधन भएको थियो । उनी जिल्लाका चर्चित बुद्धिचाल खेलाडी थिए ।
प्रतियोगितामा सातदेखि ८२ वर्षसम्मका गरी एक सय २० जना भन्दा वढी प्रतिस्पर्धीहरु प्रतिस्पर्धा गरिरहेका छन् । प्रतियोगितामा विदेशी खेलाडीहरुसमेत सहभागी रहेको जनाइएको छ ।
प्रतियोगिताका विजयी खेलाडीहरुलाई पुरस्कार तथा प्रमाणपत्रको व्यवस्था रहेको आयोजक टीमका अध्यक्ष केशव त्वानाबासुले बताए । उनका अनुसार प्रतियोगितामा पहिलो हुनेलाई नगद रु २५ हजार, दोश्रो हुनेलाई १५ हजार र तेश्रो हुनेलाई १० हजार नगद पुरस्कारको व्यवस्था रहेको छ । साथै चौथौ हुनेलाई आठ हजार, पाँंचौ हुनेलाई ६ हजार र सान्त्वनालाई पाँंच हजार नगद पुरस्कारको व्यवस्था रहेको छ ।
भक्तपुर युवा टीम भक्तपुरकै एउटा पुरानो खेलकुद खेलकुद टीम हो । यसले प्रत्येक वर्ष भक्तपुर कप खुुल्ला फुटबल प्रतियोगिता गर्दै आइरहेको छ । टीमका संस्थापक अध्यक्ष विश्वराम कवांले प्रतियोगिताको उदघाटन गरेका थिए ।
कार्यक्रममा भक्तपुर नगरपालिका वडा नं ७ का वडा अध्यक्ष उकेश कवां, भक्तपुर नगरपालिका खेलकुद समितिका अध्यक्ष एवं भक्तपुर नगरपालिका वडा नं १ का अध्यक्ष श्यामकृष्ण खत्री, आयोजक टीमका अध्यक्ष केशव त्वानाबासु, पूर्व अध्यक्ष तुल्सीराम ग्वाछा, मृतक ग्वाछाका सुपुत्रलगायतले बुद्धीचाल खेलका विविध पक्षबारे चर्चा गरे ।
-1736344782.jpeg)
