साबा प्रि क्वालिफायर खेल्ने नेपाली टिम तयार

काठमाडौं । फिबा एसिया कप २०२१ को साबा प्रि क्वालिफायर खेल्न नेपाली टोली ढाका जाने भएको छ । बंगलादेशमा आगामी मंगलबारबाट सुरु हुने प्रतियोगितामा सहभागि हुन नेपालको पुरुष बास्केटवल टोली भोली साँझ ५ बजे ढाका प्रस्थान गर्ने भएको हो ।

काठमाडौंमा शुक्रबार एक कार्यक्रमको आयोजना गरेर नेपाल बास्केटवल संघले ढाका जाने नेपाली टोलीको बिदाई ग¥यो । संघका अध्यक्ष लामा टेण्डी शेर्पाले बंगलादेश जाने नेपाली टिमका सदस्यलाई जर्सी सहित औपचारिक बिदाई गरे ।

प्रतियोगितामा नेपाल सहित बंगलादेश, श्रीलंका, भु्टान र माल्दिभ्सले सहभागि जनाउने छन् । बलियो प्रतिद्धन्दी इन्डिया सहभागि नहुने भएकाले नेपाल शीर्ष दुई भित्र गर्दै डिभिजन २ मा छनोट हुने सम्भावना छ ।

संघका अध्यक्ष लामाले बंगलादेशले ढिलो गरेर निमन्त्रणा गरेका कारण अभ्यासमा केही समस्या भएपनि नेपालको अघिल्लो चरण प्रवेश सम्भावना बलियो रहेको बताए ।
‘प्रतियोगिताले नेपाली खेलाडी र समग्र नेपाली बास्केटवलका क्षेत्रकालागि सुखद नतिजा दिन सक्छ ।’ उनले भने ।

नेपाली टोलीका कप्तान सदिश प्रधान, सौरभ श्रेष्ठ, अजय कुसवाह, विनोद महर्जन, दिलेश्वर साह, राजिव जोशी, मबिन्द्र भण्डारी, निश्चल महर्जन, मनिषराज राजोपाध्याय सुवेदी, मनिष केसी, विजय बुर्जा र आयुष सिंह रहेका छन् ।

कप्तान सदिश प्रधानले इन्डियन टिम सहभागि नहुने भएकाले नेपाललाई अघिल्लो चरण प्रवेशको मौका रहेको बताए । ‘इन्डिया नभएकाले हाम्रो मुख्य लक्ष्य पहिलो बन्नुनै हो ।’ उनले भने, ‘बंगलादेश र श्रीलंकासंग यसअघि समेत नेपालले राम्रो टक्कर दिने भएकाले अघिल्लो चरण छानिने छौ ।’

कप्तान प्रधानले नेपालले सजिलै अघिल्लो चरण प्रवेश गर्ने र त्यो नेपाली बास्केटवलका लागि सबै भन्दा सुखद पक्ष रहेको बताए । बंगलादेशमा हुने छनोट प्रतियोगितामा शीर्ष दुईमा पर्ने टोली डिभिजन टु्मा छनोट हुनेछ । डिभिजन टुको शीर्ष दुई भित्र पर्ने टोलीले अन्तिम चरणको छनोटमा प्रवेश गर्नेछ ।

नेपालले आगामी बुधबार माल्दिभ्ससंग खेल्दै प्रतियोगिताको सुरुवात गर्नेछ । नेपालको खेल बिहिबार भुटान, शुक्रबार श्रीलंका र शनिबार आयोजक बंगलादेशसंग हुनेछ ।