पिस प्वाइन्ट सेमिफाइनलमा

काठमाडौं । आयोजक पिस प्वाइन्ट ३६१ डिग्री पाँचौं पिस प्वाइन्ट कप अन्तरविद्यालय छात्र फुटबल प्रतियोगितामा आइतबार सेमिफाइनलमा प्रवेश गरेको छ । पिस प्वाइन्टले लिबर्टीबाट वाक ओभर पायो ।

सानोगौचरणमा भइरहेको प्रतियोगितामा सिद्धार्थ बनस्थली, नेपाल तारा र छहारी पनि सेमिफाइनलमा पुगे । सिद्धार्थ बनस्थलीले प्रस्फुटनलाई ४–० गोलले हरायो । सिद्धार्थका अंकित तामाङ, रमित भण्डारी, विजय मराठा र दीप भट्टराईले गोल गरे ।

नेपाल ताराले नोबेल एकेडेमीमाथि ५–० को सहज जित दर्ता गर्यो  । भुवन श्रेष्ठ एक्लैले ४ गोल गरे भने बाँकी १ गोल सुवास लामाको नाममा रह्यो । छाहरीले क्याम्ब्रिजलाई ८–० को फराकिलो गोलअन्तरले पाखा लगायो । छहारीका निशान तामाङले ३, सन्देश पाख्रिनले २ र रुपेश दाहालले १ गोल गरे । दुई गोल आत्माघाती रह्यो ।

सेमिफाइनलमा छहारीको भेट सिद्धार्थ बनस्थलीसंग हुनेछ भने नेपाल ताराले पिस प्वाइन्ट विरुद्ध खेल्ने छ । सेमिफाइनल सोमबार हुनेछ ।