काठमाडौं । नेपालमा आयोजना हुने १६ औं एसियन क्रस–कन्ट्री च्याम्पियनसिपका लागि नेपाल एथलेटिक्स संघले बागमती प्रदेश खेलकुद विकास परिषद, नेसनल लाइफ इन्स्योरेन्स कम्पनी लिमिटेड र एमएडब्ल्यु इन्टरप्राइजेज प्र.लि.सँग सम्झौता गरेको छ ।
गोकर्ण फरेस्ट रिसोर्टमा आगामी फागुन २३ गते मंगलबार आयोजना हुने च्याम्पियनसिपका लागि संघले बागमती प्रदेश खेलकुद, नेसनल लाइफ र एमएडब्ल्युसँग सम्झौता गरेको हो ।
एसियन एथलेटिक्स एसोसिएसन (एएए) ले दुई–दुई वर्षमा सञ्चालन गर्दै आएको एसियन क्रस–कन्ट्री च्याम्पियनसिप नेपालमा आयोजना गर्नको लागि बागमती खेलकुद विकास परिषदले सहयोग गर्ने सम्बन्धी सम्झौता–पत्रमा संघका अध्यक्ष राजीव विक्रम शाह र परिषदका सदस्यसचिव सूर्यलाल भण्डारीले हस्ताक्षर गरे । एनएलआईसीएलको तर्फबाट प्रमुख प्रेमा राज्यलक्ष्मी सिंहले प्रमुख कार्यकारी अधिकृत सुरेशप्रसाद खत्रीको उपस्थितिमा हस्ताक्षर गरे । त्यस्तै, एमएडब्ल्यु इन्टरप्राइजेजको तर्फबाट मार्केटिङ म्यानेजर रमेश दनेखुले हस्ताक्षर गरेका थिए ।
'नेपालले २२ वर्षपछि आयोजना गर्न लागेको एसियन क्रस–कन्ट्री च्याम्पियनसिप देशकै लागि गर्वको कुरा हो । यसले अन्तर्राष्ट्रिय जगतमा नेपालको प्रतिष्ठा बृद्धि गर्ने छ । हामी यस च्याम्पियनसिपलाई भव्य एवम् सफलतापूर्वक आयोजना गर्ने अन्तिम तयारीमा छौं । हाम्रो यस अभियानमा जोडिएकोमा बागमती प्रदेश खेलकुद विकास परिषदलाई विशेष धन्यवाद,' सम्झौतापछि अध्यक्ष शाहले भने, 'निजी क्षेत्रको प्रतिनिधित्व गर्दै हाम्रो हौसला बढाएकोमा नेसनल लाइफ इन्स्योरेन्स कम्पनी लिमिटेड र एमएडब्ल्यु इन्टरप्राइजेजलाई धन्यवाद व्यक्त गर्दछु । सरकार र निजी क्षेत्रको लगानीमा हाम्रा खेलाडीहरूले यसपाली च्याम्पियनसिपमा पदक जितेर इतिहास कोर्ने विश्वास छ ।'
च्याम्पियनसिपमा एसियन एथलेटिक्स एसोसिएसनका सदस्य ४५ देशमध्ये धेरै देशका खेलाडी सहभागि हुन नेपाल आउने आशा गरिएको छ ।
च्याम्पियनसिपमा पुरुष र महिलाका सिनियर र जुनियर गरी इन्डिभिज्युअल चार इभेन्ट्समा प्रतिस्पर्धा हुनेछ ।
यसै साता नेपाली खेलाडीको छनोट प्रतियोगिता पनि भइसकेको छ ।
