मिनु र अन्जनी छनोट

काठमाडौं । त्रिभुवन आर्मी क्लबकी मिनु गुरुङ र बक्समान्डुकी अन्जनी तेली भारतमा आयोजना हुने इबा वर्ल्ड वुमन्स बक्सिङ च्याम्पियनसिपका लागि छनोट भएकी छिन् ।

नेपाल बक्सिङ संघले सातदोबाटोस्थित बक्सिङ कभर्डहलमा आयोजना गरेको छनोटबाट मिनु र अन्जनी छनोट भएका हुन् ।

महिला ५२ केजी तौल समूहमा मिनुले फाइनलमा एपीएफका शर्मिला तामाङलाई ५:० अंकको आधारमा हराएर छनोट भएकी हुन् ।

महिला ५२ केजीमै अन्जनीलेले फाइनलमा आर्मीकी वर्षा श्रेष्ठलाई ५:० अंकको आधारमा हराएर छनोट भएकी हुन् ।

च्याम्पियनसिप भारतको राजधानी नयाँ दिल्लीमा मार्च १३ देखि २७ तारिखसम्म आयोजना हुनेछ ।

छनोट अन्तर्गत नै ५० केजीको क्वाटरफाइनलमा रमिसा श्रेष्ठ (आरडिएस) र आरति बम्जन (आर्मी) ले क्रमश: पुलिसका रिता धरला र झापाका तेजिमाया गुरुङलाई  ४:१ र ५:० अंकको आधारमा जित हासिल गर्दै सेमिफाइनलमा स्थान बनाएका छन् ।

५७ केजीको सेमिफाइनलमा झापाका खेलाडी शुस्मिता राईले पुलिसका निशा तामाङलाई ३:२ अंकको  आधारमा जित निकाल्दै फाइनल यात्रा तय गरेकी छिन् ।

त्यसैगरि ७५ केजीमा एपीएफका खेलाडी सरस्वती राना मगरले आर्मीका अनुपा चौधरीलाई एबिडीको आधारमा हराएर फाइनलमा स्थान बनाएकी छिन् ।