इलाम । नेपाली फुटबलको अहिलेको प्रमुख समस्या हो खेलाडी पलायन । दिनहु जसो विमानस्थलमा नेपाल छाडेर विदेश पलायन हुने खेलाडी भेटिन्छन् । नेपाली फुटबल अस्थिर बन्दै गएपछि अहिले राष्ट्रिय टोलीका धेरै खेलाडीहरुले नेपाल छाडेका छन् ।
'ए' डिभिजन लिग समेत व्यवसायिक नहुँदा दैनिक जीवनयापनका लागि खेलाडीहरु अष्ट्रेलिया, युरोप र खाडी मुलुक तर्फ गएका छन् । पलायनबारे एन्फा जिम्मेवार नभएको खेलाडीहरुकै आरोप छ ।
नेपाली राष्ट्रिय टोलीका पूर्व मिडफिल्डर प्रलयराज भण्डारी एन्फा पदाधिकारी खेलाडीको सुविधा भन्दा पनि आफ्नो स्वार्थ पुर्तिमा लागेको बताउँछन् ।
‘एन्फाको भिजन जिरो दोष खेलाडीलाई । आफ्नो तलब १ लाख ५० हजार खेलाडीलाई १८ हजार’ उनी भन्छन् ‘ सबै एन्फाका पदाधिकारी गाडीमा खेलाडी जति खाडीमा । खेल आयोजना गर्न र गराउन नदिने एन्फा अनि खेलाडीहरु नेपालमा के गरेर बस्ने । तिमीहरुको घिनलाग्दो राजनीतिमा जहिले खेलाडीहरु मर्नुपर्ने ?’
आजकाल प्रलय दिनहु जसो सामाजिक सञ्जालमा एन्फाको आलोचना गरिरहेको भेटिन्छन् । थ्री स्टारबाट व्यवसायिक फुटबल खेलेका प्रलय भविष्य नदेखेर अमेरिका पलायन भएको १ दशक भन्दा लामो समय भएको छ । नेपालमा आयोजना हुने आहारारा लगायत केही महत्वपुर्ण प्रतियोगितामा उनले अफिसियलको रुपमा सहभागिता जनाउन भने छाडेका छैनन् ।
‘नेपालमा फुटबल खेलेर हुने केही पनि हैन् । तर नेपाली फुटबलको माया लागेर केही प्रतियोगितामा फरक भुमिका देखिने गरेको छु । नेपाली फुटबलमा थोरै भएपनि खेलाडीको रुपमा योगदान दिएको छ तर अझै पनि एन्फाको आयोजनामा हुने प्रतियोगितामा रंगशाला खेलाडीको रुपमा र्छिन पाइदैनन् । हाम्रो योगदानको कदर खोइ ?’ उनी प्रश्न गर्छन् ।
प्रलय जस्तै पूर्व राष्ट्रिय खेलाडी निराजन खड्का खेलाडीहरु सामान्य आवश्यकता समेत पूरा नभएको महसुस भएपछि पलायन भएको बताउँछन् ।
एन्फा महासचिव किरण राईले धैरे कमाउने चाहनाका कारण खेलाडी पलायन भएको बताएपछि असहमती जनाउँदै खड्का भन्छन्, ‘पैसाको लागि कहिले पनि थिएन् । खेलाडीहरु प्रतिको धारणा अपमानजनक र जवाफदेहित विहिन छ । आफ्नो ज्यान दिने खेलाडीको लागि टेबलमा खाना छैन, चोटपटक वा पछि वास्ता छैन, मूलतया यो कुनै भविष्य छैन् ।’ उनी भन्छन् ‘ तथ्यलाई स्वीकार गर्नुहोस् । झुट बोल्ने र आफूलाई ढाकछोप गर्ने प्रयास गर्नुको सट्टा यसलाई परिवर्तन गर्ने वाचा गर्नुहोस् ।’
राईले खेलाडीहरु नेपालमा पाएको पैसाबाट सन्तुष्ट नभएकोले धेरै कमाउने चाहनाले पलायन भएको बताएका थिए । उनले खेलाडीहरुको नीजि मामलामा हस्तक्षेप गर्न नसकिने अभिव्यक्तिपछि खेलाडीहरुमा असन्तुष्टी पैदा भइरहेको छ ।
पछिल्लो १ वर्षको अवधिमा ३५ भन्दा बढि राष्ट्रिय खेलाडीहरु नेपाली फुटबल छाडेर विदेशीए । त्यसमध्ये आधा खेलाडी विगत २ वर्ष यता सिनियर राष्ट्रिय टोलीबाट सहभागि भएका खेलाडी हुन् । आगामी फागनु १९ गतेबाट संचालन हुने शहिद स्मारक 'ए' डिभिजन लिगका लागि विभिन्न क्लबमा अनुबन्धित भएका खेलाडीहरु लिग अघि नै नेपाल छाडेर लागे ।
धेरै खेलाडीहरु अष्ट्रेलिया गन्तव्य बनाउँदा केही खेलाडीहरु भने खाडी मुलुक तर्फ भविष्य दाउमा राखेर गएका छन् । विभागीय टोलीमा खेलाडीहरुको भविष्य तुलनात्मक रुपमा सुरक्षित मानिन्छ । तर केही खेलाडीहरुलाई विभागको जागिरले समेत आर्कषित गराउन सकेन् ।
विभागीय टोली त्रिभुवन आर्मीमा जागिरे रहेका विवेक बस्नेत दुवई गए । उनीसंगै नेपाल पुलिसका गोलरक्षक रोशन खड्का पनि दुवई गएका छन् । एपीएफबाट खेलेका रुपक लामा, आशिष लामा र राजेन्द्र रावल समेत नेपाल छाडेर पलयान भएका छन् ।
आर्मीका गौतम श्रेष्ठ, पुलिसका तेज तामाङ केही दिन अघि मात्र अष्ट्रेलिया पुगे । विगत ३÷४ वर्ष यता मात्र खेलाडीहरु अष्ट्रेलिया पलायन हुन् थालेका हुन् । २०७६ भन्दा अघि पलायन भएका धेरै जसो खेलाडीको गन्तव्य खाडी मुलुक नै थियो ।
अहिले पलायन नभएका राष्ट्रिय खेलाडी समेत चाडै नै विदेशीने सोच बनाएका छन् । राष्ट्रिय टोलीबाट मिडफिल्डर विशाल राई समेत सन्तुष्ट छैनन् ।
‘जता बाट पनि पीडित चाँही खेल र खेलाडी मात्रै हुनुपर्ने हो त ? हामीले त यती लामो समय जसो तसो खेल्यौ तर के अबको पिढिले नखेल्नु ? हामीले भन्दा राम्रो गर्ने अधिकार आउदो पुस्तालाइ छैन र ?’ उनी प्रश्न गर्छन् ‘खेलाडीहरु वर्षमा ४–५ महिनाको तलबमा सन्तुष्ट बस्नुपर्छ । अनि अझ त्यस माथि यही ४–५ महिनाको तलब पनि सबै क्लबले खेलाडिहरुलाई भुक्तानी गरेको छ त ?’
नेपाली फुटबलमा पछिल्लो समय भएको गतिविधिबाट सन्तुष्ट नरहेका विशाल पनि विदेश पलायन हुने सोचमा छन् ।
