काठमाडौं । दक्षिण एशियाली यु–२१ क्षेत्रिय ब्याडमिन्टन च्याम्पियनसिपको मिक्स टिम ईभेन्ट्सको उपाधि भारतले जितेको छ ।
बिहिबार भएको फाइनलमा नेपाललाई ३ - १ ले हराएर भारतले उपाधि रक्षा गरेको हो । भारतले गत संस्करणको पनि उपाधि जितेको थियो ।
हल्चोकस्थित एपीएफ क्लबको कभर्ड हलमा पुरुष एकलमा नेपालका नवीन श्रेष्ठले भारतका प्रियान्सु रजावतलेलाई २१-१२ र २१-१७ ले पराजित गरे ।
महिला एकलमा नेपालकी रशिला महर्जन भारतकी मालविका बंसोदसंग २१-१० र २१-८ ले पराजित भईन् ।
यस्तै पुरुष डबल्सको फाइनलमा नेपालका नवीन श्रेष्ठ र प्रिन्स दाहालको जोडीलाई भारतका बिष्णुबर्दन गौड र ध्रुव रावतको जोडीले २१-१५ र २१-१७ ले हराए ।
महिला डबल्समा भारतका पूर्वा बर्भे र तनिशा क्रोष्टाको जोडीले नेपालका जेसिका गुरुङ र रन्जना भट्टलाई २१-५ र २१-५ ले पराजित गरे ।
भारतले उपाधि जित्दा नेपाल भने उपविजेता बनेको छ । प्रतियोगिता श्रीलंकाले तेस्रो स्थान हासिल गरेको छ ।
प्रतियोगितामा शुक्रबारबाट व्यक्तिगत स्पर्धाका खेलहरु हुनेछन् । प्रतियोगितामा नेपालसहित भारत, माल्दिभ्स, बाङ्लादेश र श्रीलंकाका खेलाडीहरुले प्रतिस्पर्धा गरिरहेका छन् ।
